U Myntri ka tnad Social Welfare u Bah Paul Lyngdoh ula ai ka song pisa ba T.15 lak tam kum ka jingiarap ia ka Mawlai Town Dorbar (MTD) na ka bynta ban tei ia ka jaka sylllok ne Center ban pynkylla ba mut ia ki nongdih Drok. U Bah Paul ula ai ka song pisa ba T.15,65,285 lak sha u President ka MTD u Bah Herlambok War ha ka jingdonlang ki nongialam ka MTD bad ki ophisar ka sorkar jylla ha ka jingialang hynne ka sngi ha Secretariat. Haba kren ha ka jingialang u Bah Paul Lyngdoh, ula ong ba ka jingai ia kane ka song tyngka ka dei ha ka wat baar ia ka MTD ban ioh ban tei pyndep ia ka Center ban ai ia ka jingsumar bad ka jingiasyllok ia ki khynnah ban lait noh na ka jingngop ha u drok khnang ba sa shisien pat kin im ia ka jingim da kaba iaid noh ha ka lynti kaba bha.
U la iathuh ba ka sorkar lyngba ka DREAM Project kala dep ban aiti ia ka pisa ha ka wat kaba nyngkong kaba long T. 6 Lak sha ka Mawlai Town Dorbar bad mynta kala aiti sa T.15 Lak tam khnang ba kin lah ban pyniaid shakhamt ia ki kam ki jam ha ka jingiakhun pyrshah ia u drok.U Myntri ula ong ba ka sorkar ka donkam ia ka jingiatreilang bad ki Dorbar Shnong ban iakhun pyrshah ia u drok bad ula pyntip ruh ba ki don 2.5 lak ngutki nongpyndonkam drok ha ka jylla Meghalaya baroh kawei.Katba u Secretary jong ka Mawlai Town Dorbar (MTD) Bah Marco Mitri ula ong ba mynshwa ki Dorbar Shnong ki iakhun pyrshah ia ka kyiad hynrei mynta kin hap ban iakhun tyngeh ia u drok uba dei u nongshun uba bamduh ia ki khynnah bad ki samla ka jylla.
U la pyntip ruh ia ka jingthmu ka MTD ban buh noh ia ka Counselling Centre kaba shi rta ha Mawlai Petrol Pump khnang ba ki khynnah bad ki samla kin ioh ban iasyllok ban lait na une u jingdih ba sniew. Ula iathuh, ba ka MTD kala pynlut pynsep ha kaban ai jingsumar bad jaka sah ia ki 42 ngut ki samla ba kin lait na ka jingngop ha u drok bad ka MTD kala pynlut pynsep ia ka jingdonkam jong kine ki samla ba kin kylla noh bad ba kin iaid noh ha ka lynti kaba dei bad ula ong ba kila don ki khynnah kiba la ioh ban mih noh ban leit sah sha la iing ban iakhun ia ki eksam ki bapher bapher.
