Ha ka jingbteng ka seng Khooid Yaka Wah Myntdu ban iakhun na ka bynta ban ai jingiada bad pynneh pynbha ia ka wah Myntdu kaba dei ka nongbsa umbam umdih ia ki nongshong shnong ka sor Jowai kumjuh ki paid nongrep ha sawdong jong ka, hynnin ka sngi u President ka seng Khooid Yaka Wah Myntdu u Khroo L Pariat ryngkat ki katto katne ki riew ryngbah ka shnong Jowai ki la hiar ban jurip sa ia ki In-Situ Nallah ne ki nala bala shna kyrpang ban pynkhuid ia ka um jakhlia ba tuid na ki thliew ïing shwa ba kan hap hapoh ka wah Myntdu. Ia kane ka In-Situ Nallah la pyntrei naduh u snem 2022 da ka tnat Urban bad Jowai Municipal Board Jowai.
Ha kane ka jingjurip ba la donlang ruh u Executive Engineer JMB, naka liang u K.L.Pariat u ong ba ka In-situ Nallah ba la shna haka bynta jong ka Treiongriang kila sakhi ba kala iarap shisha ban ai jingiada iaki um jakhlia bad ka um ba pyntuid shapoh ka wah Myntdu ruh kala kham khuid. Katba ki 10 tylli kiwei pat ki nala ha sawdong ka shong Jowai, u ong ba ka jingpyntrei ka dang sahteng bad suki palat.
Haba ia dei bad kane u ong la kyrpad ia u executive engineer ka JMB ba dei ban pyndep hashwa ban poi ka aiom slap jong u snem 2025, bad ma u ruh ula kular ban pyndep. Ha kajuh ka por u kyntu ruh iaki paidbah nongshong sawdong ka Myntdu ba kin iatreilang naka bynta ban pynim ia ka umbam umdih. Kata ban ymbret pathar iaki ñiut ki plastic kat shaba lap ba shem, namar ba ka dei ka nongshun ba khraw jong ngi hi.
