Tang hadien katto katne kynta ba lap ia ka shynrong khlieh briew, na Auckland Road Shillong, hynne ka sngi ki Pulit ki la lap shuh shuh sa ia ki shyieng lbong bad ka krung na nala ha Bivar Road, Shillong. Ka kyrwoh na u Superintendent of Police (SP) ka East Khasi Hills ka iathuh ba ia kane ka shynrong khlieh la lap ha ka 22 tarik Jymmang bad hadien mar mar ki Pulit ki la pynlong ka jingtohkit bad ka jingwad shuh shuh ia ki lyngkhot met ha ka thain.
U SP u pyntip ha ka 23 tarik, ka kynhun Pulit ka la ioh tam pat sa ia ka lbong ba la kem pyut napoh ka nala jong kane hi ka thain bad ha ka 24 tarik pat la lap sa ia ki shyieng krung hadien ka jingwad kaba neh slem bha.Ki Pulit ki suba jur ba kane ka metiap ka dei jong u rangbah briew bad ia kine ki lyngkhot met la kit noh sha NEIGRIHMS ban leh ia ka medical examination.
Ki Pulit ki la register case halor kane ka jingjia ha Sadar Police Station hapoh ka kyndon 302 IPC bad ka jingtohkit mynta ka dangiaid shakhmat ban ithuh ia kane ka metiap.Kane ka jingjia shah pyniap ka long kaba sngew shyrkhei bad pynpar niangkhriat na ka jingleh dusmon ki runar ki bym don shuh ka jingiatip lem ha ka longbriew man briew.
