Ka Dorbar Shnong Mynthong Jowai ka lap ba ka don ka jingbret pathar ia ki thyrnia bad ki tyndong pyllang snam kiba la dep pyndonkam da kaba ki thep ha ki plastik bad synduk kot bad wan bret harud ka surok bah NH-40E, Dawki-Amlarem-Jowai road ha ki bynta jong ka Riatsasim. Ia kine ki thyrnia bad tyndong pyllang snam la suba ba la wan bret da ka Passah Diagnostic Path Lab, Jowai katkum ka jinglap ia ka kyrteng ba la thoh halor ka synduk kot ba la donlang ryngkat ki phone number bad ka jingbret kam dei tang shi jaka.
Kine ki thyrnia kumjuh ki tyndong pyllang snam dei kiba la dep pyndonkam ha ban shim snam sample na ki briew namar la iohi ia ki dak snam hapoh ki thyrnia bad tyndong. Na ka liang ka dorbar shnong Mynthong ruh tang mar shu ioh jingtip ki la hiar jurip mar mar hynne ka sngi sha katei ka jaka ban jurip bad lap ba ka dei shisha, hadien kane ki la leit ujor ejahar ha Jowai Police Station.
Katkum ka ejahar ka Dorbar Shnong Mynthong ka ong, ba ka jingbret pathar ia kine ki tiar ka buh jingma ia uba bun balang, bad lehse na kane ka jingbret pathar lah ban shim kabu da kiwei pat ki briew na ka bynta ban die sha ki briew ba dih drok ki ban pyndonkam khlem ka jingtip. Nangta kine ki tyndong pyllang snam pat kin sa shah rong sha ka wah Myntdu kaba don hajan eh bad lah ban wanrah ia ki jingma ne ki jingpang ba bun jait ia ki paidbah namar ba na kane ka wah ki briew ki pyndonkam umbam umdih ha ki ïing ki sem.
