Ka Umtham kan long kawei na ki shong ban pynmih ia ki jintah iwbih bad ki kynja dawai ban iarap ia ka koit ka khiah na ka jingpyntrei ia ka Megha Aroma Mission Institute Natural Resources ban sain umphniang na u Lemongrass hapoh ka jingpyniaid ka Persara Self Help Group ryngkat ka shnong Umtham, Ri Bhoi District.U Bah Wallamlad Kharwanlang development ophisar ka Umsning C&RD Block ula iathuh katei ka project la sdang da ka Persara SHG ka kynhun ki longkmie ka shnong Umtham lyngba ka jingiarap ka ophis Umsning Block ban kyrshan ia ki longkmie ba kin lah ban ieng bad kamai da lade ia lade. Ula iathuh la dang ia kate ka project ha u snem 2020 ha ka jinglut kumba T.15 lak na bynta ban thied bad thung ia ki lemongrass, citronella, Tagetes,Minuta bad Palmarosa bad la thung ia kitei ki phlang ha ka jaka kumba 3 akar, katba ia ka kor sain umphniang la shna dang ha u bnai Iaiong, 2024 ha ka jinglut kumb ba T.7, 85,880.
U Bah Wallamlad ula pynpaw ka jingkmen ba katei ka project kan long kaba jop namar ki la sang ban sain umphniang, shna sabon, umphniang sleh met ban lait dait pyrjong bad lah ruh pyndonkam por ktah na bynta ka koit ka khiah.“Kane ka dei ka jingsdang bad ki lah ban pynmih ia kiwei ruh ki jintah iwbih kum ka sen na ak umphniang ryngkat bad kiwei ki jingkhleh” ula ong bad bynrap na ka liang ka Block ruh kan iai bud dien kiwei ki jingdonkam na bynta ban nangpynjanai bad pynbna ka jingpynmih ia ki mar. Katba ka Kong Sumarlang Thawmuit Secretary ka Persara SHG, ka la iathuh ba ki la thung 47 hajar tynrai u lemongrass na une ba ki thung ki la die ruh sha ki nongrep ha Ri Bhoi, Jaintia bad kiwei ha ka dor T.1.50 shitynrai.“Ngi dang sdang shen ban sain umphniang lemongrass” ka la ong da kaba thep ia ki sla lemongrass ha um kumba phon ha ka top bad ka jynhaw ka umphniang ka mih na pait ryngkat ka um bad hadien pyniakhlad noh ka um bad umphiang.
Ka Kong Sumarlang ka la iathuh ki ba ki dang pynmih ki long umphniang iing, ka umphniang kyllan met ban lait dait pyrjong, sabon bad halor ka jingpyniaid iew ia ki mar kam don jingeh ia mynta namar ka don ka jingdawa ia ki mar ha iew bad kymen ngin lah ban pynmih kham ki mar ha ki snem ban wan.Ha kajuh ka por, u Bah Shanding Kharshandy ula pynpaw ka jingkmen ia ka sorkar kaba la wanrah ia katei ha shnong ban ai kam ia ki longkmie bad kyrmen ka sorkar lyngba ki tnad bapher bapher kin bteng ban wanrah ia ki project kam pynroi ha katei ka thain ban ai kam ai jam ia ki longkmie bad ki samla. Ka kynhun ki nongthoh khubor ki la leit jurip ia kane ka project ha ka 31 tarik Risaw lynngba ka jingiarap ka ophis u Director Public Relation and Information, Meghalaya, Shillong.
