Ki bor pulit ka Khapmara PIC hynne ka step ki la ioh tam noh ia ka met iap ba la per halor sla um jong ka wah Umiam kaba hap hapoh u pud u sam ka shnong Umroi Nongrah hajan ka jingkieng Dwarksuid, Ri Bhoi District bad ki pulit ki la tam noh ia kane ka met bad rah sha Nongpoh Civil Hospital ban leh ia ka post mortem.
Katkum ka khubor ba la ioh lum, la iathuh hadien ba la tam ia kane ka met kiba ha iing jong u ne u rangbah ba la tip kyrteng kum u Bah Ron Cooper Massar (54) ki la wan ban kam ia katei ka met. La iathuh utei u rangbah u sah ha ka shnong Umroi Jaiawpdeng bad u la jah na iing ha ka step jong ka 20 tarik naduh ka por 4 baje eiei ha ka por ba ula mih ban leit kai step.
Na ka liang ki ba haiing, hapdeng ka jingsngewsih kthang, ki la pynpaw ba une u rangbah ba la khlad noh u dei u ba smat bha ban leit kai step bad ruh u ba trei kum u Junior Engineer jong ka tnad Water Conservation ha Shillong bad kum ki ba haiing hi kim don kano kano ka jingsuba sniew eiei halor kane ka jingjia namar u ba une u rangbah ba la khlad noh u dei u briew u ba bha bad u ba pariah bha bad um don don kano kano ka dak sniew ha ka imlang sahlang ruh.
