Ka Voice of the People Party (VPP) hynne ka sngi ka la leit iakynduh ia u Commissioner & Secretary ka tnad pule puthi ka jylla u Vijay Mantri, halor ka jingbym ioh ki nonghikai kiba la shongthait ia ka Death cum Retirement Gratuity (DCRG). Haba kren sha ki lad pathai khubor u MLA ka Mawlai u bah Brighstarwell Marbaniang ula ong ba ka party ka la iakren bad u Vijay Mantri ba u dei ban pynbeit mardor ia ka jingeh ki nonghikai namar ba don ki nonghikai kiba la shongthait ne don kiba la khlad noh shiteng por ruh kim ioh ia kane ka DCRG. U la ong ba kaba pynlyngoh ia ka seng ka long ba don ki nonghikai katto katne mar ia shongthait na ka kam ki la ioh ia ka DCRG. Kane ka long kumba niew shilliang khmat bad ka sorkar kam shym la pyllait ryntih haduh mynta.
“Ki nonghikai hadien ba ki la shongthait ne ki khlad noh shiteng por, kin ioh ia kane ka jingsiew kaba shisien na ka sorkar ka ban long T.10 lak hynrei ki don kiba khlem pat ioh satia bad don pat tang katto katne kiba la ioh bad kane ka paw ba ka dei ka jingleh shiliang khmat ka sorkar,” ong u bah Brightstarwell.U la ong ba kawei pat ka jingiapher ka rukom siew tulop namar ba ki nonghikai kolej haba ki rung kam hikai ki dei ban ioh katkum ka University Grant Commission (UGC) Pay Scale hynrei kaba lyngngoh ka long ba ka sorkar ka siew da ka state pay scale.
Ha kajuh ka por, u la ong ba ka seng ka la dawa ruh ban ai ia ka Increment ia kiba la pyndep ia ka jingpule PhD. Kawei pat ka jingdawa ka VPP ka long ban weng noh ia ka jingbuh kyndon ia ka rta rung kam nonghikai ha ki kolej. U bah Brightstarwell u la ong ba katkum ka kyndon ka UGC, kam don satia ka jingbuh rta ia ka kam nonghikai Assistant Professor ha ki college. Ka VPP ka la pynsngew ruh ba dei ban pynsted ban ai ia ka jingpynskhem ia kiba la rung kam namar ba don ki nonghikai kiba la hikai la lai snem ruh kim pat ioh satia haduh mynta bad kawei pat ka mat kaba ka seng ka la rah ka long ban pynsted ban pyllait noh ia ka Arrear jong ki nonghikai.
Ka party ka la pyrshah ia ka rukom pyniaid iaka eksamin Assistant Professor in Physical Education, namar ba kaba sngew lyngngoh ka long ba ka DHTE ka la khot ia ki nongpyniaid na ka tnad ialehkai, kaba long pyrshah ia ka kyndon ka UGC kaba la buh ba ia ki nongpyniaid ki dei ban long ki stad na ka NEHU ne ka skulbah.
