Ka Balang Catholic Mokabeng ba hap hapoh ka Iongshiwiat Parish, West Jaiñtia Hills District hynnin ka sngi u Blei ka la lehkmen ia ka jingdap 5 snem ka jingainam ia ka Maria ka nongiarap ki Kristan ha kane ka balang shnong, naduh ba la pynkyntang bad plie ia ka ïingmane.
Bad kane ka sngi ka long ruh ka jingkynmaw burom ia ka Maria ha shityllup ka pyrthei.
Kum ka dak jingleh kmen ki khun ka balang catholic Mokabeng ki la shim bynta ha ka jingrwai jingshad, kumjuh ruh ka jingiaid procession ha ka nohphai sngi ba la sdang na ïingmane bad iaid ha surok shnong ha ryngkat ka rwai ka nguh Blei katba dang iaid kjat.
Yn da poi ha ïing mane u Fr.Thawmon Sutnga Parish Priest ïongshiwiat Parish, ula lamkhmat ha ka jingduwai bad rwai.
Nangta pat la ioh ka jingkren haba iadei bad kane ka sngi na ka Sister Sentina Mary Nongsiej, kaba la ong kum ka balang catholic ki pdiang ia ka Maria bad leh burom ia ka mamar ba ka long kum ka kmie jong u Blei u Jisu ha kajuh ka por ruh kum ka kmie jong kiba ngeit ka balang catholic.
Ka ong ba don bun ki paid kristan kiba la ioh mad ia ki kam phylla ba la iarap ka Maria kumjuh kiwei pat ki briew ba la pan jingiarap na ka.
Bad kumba ka long ka briew bakhuid ba bha kaba ieid ia u Blei nalor kiba bun ki kam ba bha jong ka, kumta ka kyntu ruh ia ki pait riewngeit ban bud ia ki nuksa ba bha jong ka.
Shwa kane la don ruh ka mass ba khuid ba la pyndep da u Fr.Thawmon Sutnga Parish Priest ïongshiwiat Parish.
