Ka seng Jaiñtia National Council JNC ka ai khublei ia u Dr. Ricky AJ Syngkon uba dei u MP ka Shillong Parliamentary Seat ba u la kloi ban wan jngoh da la ki jong ki khmat ia ka Eklavya Model Residential School kaba don haka shnong Jalaphet kaba la sah teng mynta da ki bun bun snem khlem pyntreikam naduh ba la dep shna ia ki building. Ka JNC ka la pynpaw ba kane ka jingpynsahteng ia kum kine ki jaka ai jingstad ka long kaei kaei kaba pynduh nong ia ki paidbah, ia ki khynnah pule bad ruh ia kiba wad kam wad jam,ka long ka jingduh nong ruh ia ki khun samla kiba thrang ban pule hynrei kim ioh lad ban pule, bad ruh ka long ka jingpynsepei ia ka jaka kaba ki trai jaka ki la ai sngewbha da ka jingkhmih lynti ba kane ka school kan trei kam hynrei haduh mynta kam pat trei kam.
Kumban shu pynkynmaw ka JNC ka la ju phah ruh ia ka dorkhas jong ka ha u snem ba la dep na ka bynta ban kyntu bad ban dawa na ka sorkar jylla ban pyntreikam noh kloi kloi ia ki residential school bad teachers training centre ki ba dang sahteng khlem pyntreikam haduh mynta kiba don ha East Jaintia Hills District, hynrei na ka liang jong ka sorkar pat ym don jubad haduh mynta ia kine ki residential school haduh mynta wat haba lah dep shna ia ki building ne jngtei ruh, ong u Wanshwa Suting GS JNC-CEC. Hynrei lyngba ka jingwan jngoh jong u Dr. Ricky Syngkon ba dei ruh u MP na ka Shillong Parliamentary ia kane ka EMRS kaba don ha ka shnong Jalaphet ha ka 3.9.24, ngi kyrmen skhem bad khmih lynti ba kine ki residential school bad teachers training kin trei kam noh kloi kloi na ka bynta ka jingmyntoi u paidbah ba bun ba lang bad khamtam ia ki khynnah pule, ong ka JNC.
Ka JNC ka kyrpad ruh ia u MP ba don burom u Dr. Ricky AJ Syngkon ban buddien ia kine ki project ba dang sah teng bad ban wad ruh iaka dawbah dawsan ba balei lah shu ieh Khunswet kumne khnang ban ba kin lah ban treikam noh ia ki haki sngi ki ban sa wan. Bad lada ka kam ka long tang ban pynhun iaki contractor naka liang ka seng kam sngewlah ban pdiang da lei lei ruh, pynkut u Wanshwa Suting GS JNC-CEC.
