Leit jngoh u Myntri ïa ka projek PSPP ha West Bengal ban twad buit ki lad pynmih bording

U Myntri tnat bording ka Jylla u Abu Taher Mondal dang shen ula leit ban jngoh ia ka Pump Storage Programme ha Puralia (PSPP) ha jylla West Bengal, ka project pynmih ika bording ilektrik ba 4×225 MW kaba la sdang naduh u snem 2007.
Ia u Mondal la synran da u Commissioner & Secretary ka Tnad Bording ka Jylla u Sanjay Goyal, u Director (Generation) ka West Bengal State Electricity Distributor Company Limited (WBSEDEL) Subhasankar Debsarma Biswas bad ki ophisar jong ka tnad bording jong ka jylla.
U Subhasankar Debsarma Biswas ula ai ka jingbatai kaba bniah ia kane ka kynhun na ka jylla Meghalaya ha kaba ia dei bad ka rukom treikam bad ka jingpyndonkam ia ki tiar bad ki kor bapher ha katei ka project pynmih bording elektrik.
Ka jingleit jngoh jong u Myntri ia ka PPSP ha West Bengal ka long ban peit thuh ia ka rukom treikam jong ka bad ban lah pyntreikam lang ha Jylla khnang ban tem ia ka jingeh jong ka Jylla ha ka jingduna bording.
U AT Mondal ula pynpaw ba ka jingleit jngoh ia ka PPSP ka long kaba ioh buit bad jingmytoi kaba ula ioh ia ki jingtip ba bun bah bad khamtam ba kane ka projek ka dei nyngkong eh ha ka ri ban pynmih 900 MW ka bording kaba la pyni ruh ba kane ka projek ka long kaba jop.
Ula ong, ka jingdawa ia ka bording ka long kaba jur bha hapoh ka jylla Meghalaya bad kumta ki dang wad ia ki lad ki lynti ban kyntiew ha kaban pynmih bun shuh shuh iaka bording elektrik hapoh ka jylla.
Ka PSPP kadei ka projek kaba pynmih ia ka bording na ka um bad ka jingthmu ka jongka, ka long ban ialeh ban pyndap pynbiang iaka jingdonkam ia ka bording elektrik.
Kumba long mynta ka Meghalaya ka pyntreikam 8 tylli ki projek kiba pynmih ia ka bording kaba 355 MW bad la ioh 228 MW na ki projek pynmih bording jong ka sorkar pdeng bad kumba 68% ka jingioh iaka bording ka long da kaba pynmih na ka um bad kane ka buh ruh ha ka kyrdan hapoh ka ri, ba ka Meghalaya kadei kaba don iaka jingsngewkhia ha kaba iadei ban iada ia ka mariang.