U Angshuman Dey, Joint-Secretary jong ka Ministry of DoNER & Secretary ka North Eastern Council (NEC) uba long ruh u Central Nodal Officer, Jal Shakti Abhiyan na ka bynta ka East Khasi Hills District hynne ka sngi palei, ula leit jurip ia ka jingpyntrei kam ka Jal Shakti Abhiyan-Catch the Rain Program jong ka Sorkar India ha ka ophis jong ka Deputy Commissioner, ka East Khasi Hills District.
U Angshuman Dey, ula iaroh bad pynpaw ka jingkmen halor ki kam kiba la leh da ka distrik bad ula bynrap ba ki don shibun ki lad ba ka distrik bad ki kynhun ha ki Block ki lah ban pynbha kum ka jingiatreilang bad ki riew kynthei hapoh ka Nari Shakti sha ka Jal Shakti Campaign, ka jingiatreilang bad jingai jingkyrmen ia ki nongshong shnong bad ka jingbuh ha ki Map ia ka koit ka khiah jong ki tyllong um, jingpynroi ia ki prokram ban pynneh ia ki khlaw ki btap.
Ula kyntu ruh ia ka Distrik ban pyntreikam bad pynbha ia ka Jal Shakti Kendra ban long kum ka jaka ai jingtip na ka bynta ki nongshong shnong ban ioh ia ki jingtip bad ki jingiarap ha ka jingpyntreikam ia ka Jal Shakti Abhiyan.
Katba u bah S. Warjri, MCS, ADC ka East Khasi Hills, ula batai bniah halor ki kam kiba la leh ha ka District da baroh ki tnad ha kaba iadei bad ka um.
Ha katei ka jingïalang la ïadon lang u Dhrubajyoti Khanikar, Scientist D, Central Ground Water Board kum u Technical Officer uba la peitngor ïa ki kam bad ka jingiaid jong ka Jal Shakti Abhiyan – Catch The Rain Campaign, East Khasi Hills, PD DRDA, BDO, ki ophisar na ki tnad bapher bad na ki ophis jong ki Block.
Hadien ka jingïalang ki ophisar na ka Central bad State Team kila leit jngoh ia ka Jal Shakti Kendra, East Khasi Hills, Shillong.
Kumban shu pynkynmaw ka Ministry of Jal Shakti ka la pyllait ia ka Jal Shakti Abhiyan (JSA) ha u snem 2019 ha ki 1,592 tylli ki Block na ki 2,836 tylli ki Block ha ki 256 tylli ki Distrik kiba duna um ha ka ri. Ha u snem 2021, ka “Jal Shakti Abhiyan: Catch the Rain” (JSA: CTR) ha ka phang “Catch the Rain – Where it Falls When it Falls” la pyllait da u Myntri Rangbah duh ka ri bad kaba kynthup ia ka Catch the Rain (CTR) Campaign ban sdang ha baroh ki Block ha baroh ki Distrik ha ka ri baroh kawei.
Ka jingpyntreikam jong ka JSA-CTR kala sdang ruh ha u snem 2019, hynrei, namar ka khlam COVID-19, ka jingiaid kala suki bad ha u snem ba la dep, ha ki jingpyrshang bad jingthmu bapher ba la leh ka East Khasi Hills District kala kiew kum kawei na ki Distrik ba kham shakhmat.
Ka Distrik ka la lah ban pynthymmai, ban tei bad ban Geo-tag haduh 3,526 tylli ki jaka pyllang um bad ki jingtei bapher bapher kiba iadei bad ka jingthmu ban pynneh pynsah ia ki tyllong um.
