Leit pyniasoh NPP ki nongialam ba hakhmat ka BJP, INC & TMC

Jowai Iaiong: Ki heh ka National People’s Party (NPP) hynin ka sngi kila
pdiang sngewbha ia ki 4 ngut ki nongkyrshan ba hakhmat duh jong kiwei pat ki seng saiñ pyrthei kiba kynthup ia u Bah Krison Langstang u MDC ka BJP na Sumer constituency, u Daniel Dann u kyrtong MLA barim ka INC na Jowai, u kyrtong MLA barim ka INC na Mowkaiaw u Bah Nehemayah Tyngkan bad u Lasting Suchiang u kyrtong MLA barim ka TMC na Mowkaiaw ryngkat bad ki nongkyrshan ki jongki.
Ia kine ki nongialam la pdiang sngewbha da u National President ka NPP u Conrad Sangma, u National Secretary u Sñiawbhalang Dhar, u President NPP Meghalaya u Bah Prestone Tynsong ha ryngkat ki MLA, ki MDC ka NPP, ha ka jingialang ialap elekshon kaba la long ha ha Jowai.
U Prestone Tynsong haba kren u ong, ka jingshah kynnoh ka wan shisien man ka san snem bad hapoh ka jingialam ka NPP ka sorkar MDA-1 bad ka jingbteng ia ka MDA 2 ka pyni ba ka party kala nang khlaiñ, kumta u ngeit skhem ba ha ka Election MLA ban wan ruh ka NPP kan sa lah ban synshar marwei.
U la ong kumba long mynta ka lyer u Prah ka shongshit hynrei kam don nongrim, kumta donkam ban shongshit ha ka nongrim ba skhem ym ban shah ialam bakla ha ki katto katne ngut.
Shuh shuh u ong ba ha ka jingiadei bad u pud ka jylla ym don mano mano ba nud iakren pynbeit pud hynrei ka sorkar NPP kala tur shaphrang ban leh ia kaba donkam nalor kiwei pat ki issue kaba kiwei kim nud satia ban ktah.
U Conrad Sangma ula ong ba ha ka por ba sdang ia ka Party naduh u Bah Sñiawbhalang Dhar, Bah Prestone Tynsong bad u Bah Commingone Ymbon ki tieng bha hynrei kat nang iaid ki por ki snem pat ki kmen ban iohi ba ka party kala nang khlaiñ lyngba ka jingbteng ki paidbah ban wan pyniasoh.
U ong ba ka jingioh ka sorkar MDA-1 ban pyndep iaka samoi jong ka kum ka sorkar dei ba ki paidbah ki shaniah bad jied biang ruh iaka ha ka MDA 2.
U Conrad ula ong ba ki don beit ki jingduna hangne hangtai hynrei ka daw ba jop biang dei ba ki shah shkor bad trei naka bynta ki paidbah bad ruh ka shlur ban shimti iaki kam kaba kiwei pat ki sorkar barim kim nud ban ktah.
Haba iadei bad ka jingpyrshah kiwei pat iaka ktien Hindi, u Conrad ula ong ba tang shu palat Khanapara la hap kren hi da ka Hindi bad ha Parliament donkam ban tip ia ka Hindi, haba ia pynbeit pud donkam ban kren bad sngewthuh ia ka Hindi.
U la ong ki don ki seng kiba pynbiej paidbah haba iadei bad u pud u sam ka Jylla hynrei haba kylli ia ki kyrteng shnong ba iakajia kim tip ei ei ruh em bad kane ka sorkar kaba la sdang ban pynbeit ia u pud u sam kumta kan pyndep ruh haduh ban da kut.
Ha kane ka sngi la ioh ruh ka jingkren na u Bah Commingone Ymbon MLA ka Raliang, Bah Sñiawbhalang Dhar bad na ki Nongialam kiba la pyniasoh bad ka NPP.