Shillong, Jymmang: Kawei ka longkmie kaba tip kyrteng kum ka kong Bindas Syiem na ka shnong Umden, Ri Bhoi District ka la shong shah thngan marwei ha parking lot jong Additional Secretariat ban dawa na ka sorkar ban shna ia ka surok Nongpoh Umden Sonapur. Kane ka longkmie kaba don lai ngut ki khun bad iwei i khun ksiew ka la shim ia kane ka sienjam ban shong shah thngan bad sngi bad miet ha kane ka jaka khlem pud tad haduh ban ba ka sorkar kan pynshna ia ka surok.Haba kren sha ki lad pathai khubor ka kong Bindas ka la ong ba ka jingwan marwei ban shah thngan ha kane ka jaka, ka long ba naduh ba sdang ym don mano mano ban ai jingmut ia ka ban shim ia kane ka sienjam ban wan dawa ia ka surok na ka sorkar bad ka khlem pan ka jingkyrshan namo nano.“Nga kwah ban shim hi ia kane jingiakhih marwei namar nga da lade nga mad ia ka jingeh, bad lada bun lehse ka jingiakhih ka lah ban pulom noh,” ong ka kong Bindas.
Ka kong Bindas ka la ong ba la 15 snem kane ka surok ka sah khongreng bad kaba pynbitar ia ka, ka long ba la bun snem man ki MLA kiba jop bad kiba rem, ki la shu kular thok ia kane ka surok. “ Da ki phew snem, ki MLA kiba jop bad kiba rem ruh ki kren ia kajuh ka kyntien ia ka surok. Hadien ba ngi la shah kular thok, ka la pynlong ianga ban dawa ia ka hok namar ia ka surok baroh ki donkam naduh uba riewspah, u duk u suk,” ka la ong. Ka la ong ban leit iakynduh ia ki Myntri Sorkar kam dei ka kamram jong ka ban leit wad jingshai, hynrei ka shim da kane ka sienjam ba ka sorkar kan shna.
“Nga la iakynduh ia u Executive Engineer bad ula ong ba hadien ba la mih ka resol MP, yn sa pyllait noh ia ka mang tyngka na bynta katei ka surok bad yn sa khot tender,” ong ka kong Bindas bad bynrap ba kine ki dei tang ki kyntien thok. Haba iadei bad kane ka jingeh, ka la ong ba haduh mynta kam pat shym la leit ud ha kano kano ka tnad sorkar namar ba kam dei ka kamram jong ka.
