Ka Jaiñtia National Council (JNC) – Western Zone ryngkat ka jingiasynran lang ki Nongialam ka CEC hynne ka sngi ki la leit hiar sha ka shnong Lapangap halor ka jingjia shah pyniap uwei u rangbah uba kyrteng u Ma Telme Talang mynha ka 30 tarik u Jymmang, 2024.
Na ka Liang ka seng ka la leit ban ia sngewlem lang bad ka iing iba khlad bad la buh ruh haka jingduwai ba in ioh iaka jingpyntngen khamtam na ki kti u Trai Kynrad najrong.
Ka seng ka la ioh ruh ban iakynduh bad u Waheh Shnong u ma Deimonmi Lyngdoh ban iakren ruh halor katei ka jingjia ba sngewsih.
Ha kane kajuh ka sngi ka seng kala hiar ruh sha ka jaka ba la lap iaka met iap jong u ma Telme Talang lyngba ka jingsynran na u Waheh Shnong bad la iathuh ruh ba katkum ki dak ki shin ym lah ban pdiang ba ioh dei ki briew kiba napoh ka shnong hi kiban donkti, hynrei la suba jur ba ioh dei ki briew kiba nabar shnong, bad ha kajuh ka por ruh ka dei ka shnong kaba don ha khappud Assam.
Ka seng ka la leit ruh shapoh Nartiang Police station bad la iakynduh ia ki ophisar bad la iathuh ha ka seng ba ka jingtohkit ka dang iaid shakhmat bad ym pat lah ruh ban iathuh eiei namar haduh mynta ym pat shym la tip mano ba donkti.
U Vice President ka JNC Western Zone bah Hamehi Bamon u la pynrem jur ia kane ka jingshah pyniap ki briew khamtam ha kine ki jaka khappud namar ym dei tang kane hynrei la katno sien ba ki paradoh parasnam ki jong ngi kin mad ia kum kine ki jait jingjia ba sngewsih, bad sa katno sien ruh kine ki jaka kin iai mad ia ki ummat khtang ba sngewsih.
Ka seng ka kyntu jur ruh iaka sorkar ba ka dei ban leh wut wut ia kaba donkam bad ban kem ruh iaki briew thrangsnam ki runar bad ban leh ruh da kaba tyngeh ym ban aili iano iano ne dei mano mano namar ban shim iaka mynsiem khamtam ki pli ki duk ki suk ka dei ka kam kaba poh tam, ong u Hamehi Bamon.
Ka seng ka pynpaw ruh ba haba kiwei ki jaidbynriew ki shah pyniap katno tam ka jingtrei shitom ki pulit ban ioh kem wut wut ia kiba donkti, bad ha kane ruh ka bynta ngi khmih lynti ba kajuh hi ka jingtrei shitom ngi kwah ban iohi naki pulit, namar ngim kwah shuh ban iohi ba ki briew jong ngi kin shah long langkñia ha man la ki por khamtam haki jaka khappud bad ruh namar ka dei ka jaka kaba lah ju don ka jingiakynad ha man la ki por bad kiwei pat ki jaidbynriew.
Ka seng ka pynsngew ruh ba ki bor jong ka aiñ kin leh ia kaba donkam tam bad kaba dei eh khnang ba kato ka iing ba mad iaka jingsngewsih kan ioh iaka jingbishar jok kaba biang tam.
