Leit tied jingkhang ka NESO ha Supreme Court ban pynsangeh ia ka CAA

Ka Synjuk ki samla pule ka thaiñ shatei lammihngi hapoh ka lama jong ka North East Students’ Organisation (NESO), ka la leit mudui da ka mukotduma hapoh ka Supreme Court jong ka Ri India ban kyrpad ban pynsangeh ia ka jingpyntreikam ia ka Rules jong ka Citizenship (Amendment) Act, 2019.

U Chairman ka NESO u Bah Samuel Jyrwa ula pyntip ba ki la mudui ha ka Supreme Court halor ka Rules jong ka Citizenship (Amendment) Act, 2019 bad kyrpad ia ka Iingkashari ba kan pynmih ia ka hukum ba pynsangeh shuwa ia ka jingpyntreikam ia katei ka Rules. Ka NESO ka la pyntip ruh, ba ka la dep ban mudui ha ka Supreme Court ha ka 19 tarik Nohprah, 2019 ban pyrshah ia ka CAA 2019.

“Watla, ka CAA 2019 ka la pyllait ia ki Jylla kiba pyntreikam ka ILP ba kynthup ia ka Mizoram, Nagaland, Arunachal Pradesh bad Manipur bad ruh ki jaka ba hap hapoh ka Sixth Schedule ba kynthup ia 98% jong ka Meghalaya, 70% jong ka Tripura bad 8 tylli ki District ka Assam, hynrei 27 tylli ki District ka Assam kim shym la lait satia bad kane ka buh ia ka jingma ba khraw ia ka thain Shatei Lam Mihngi baroh kawei” la pynpaw u Bah Samuel Jyrwa.

Ula ong, ban iada na ka jingshah ktah ki jaidbynriew rit paid ka thaiñ shatei lammihngi na ka jingwan rung kyrthep ki briew ba nabar bad na Bangladesh, ka long kaba kongsan ba ka CAA 2019 kam dei ban treikam namar kan nang pynsniew ia ka jinglong jingman ha ka thain shatei lammihngi baroh kawei.