Ki lai tylli ki Trophy jong ka 133rd IndianOil Durand Cup ki la poi sa ha nongbah Meghalaya ka Shillong bad hynne ka sngi ka pyni paidbah da ka jingsngewsarong ha U Soso Tham Auditorium in Secretariat Hills, ha ka jingdon ryngkat u myntri rangbah ka jylla u Conrad K. Sangma. Kane kan dei ka sien kaba nyngkong ia ka nongbah Shillong ban pynlong ia kane ka lympung ialehkai phubtol. Haba ia dei bad kane myntri rangbah ka jylla u la iaroh ia ka jingtrei shitom ki nongpyniaid ka Durand Cup Organizing Committee na ka bynta ban pynlong ia kane ka lympung ialehkai phutbol kaba la rim tam ha dewbah Asia bad kane ka dei ka history na ka bynta ka jylla, kaban buh ia ka Shillong ha ka football map jong ka ri. Kine ki lai tylli ki trophy hadien ba ka kut ka prokram la rah pyniaid ia ki ha kylleng ka nongbah bad kin pyniaid ruh ia ki sha kiwei ki district, ba la sdang rah na State Centra Library, ba la kaweh lama plie da u Sangma, ha ka jingdon ryngkat u Air Marshal SP Dharkar, Air Officer Commanding ka Chief Eastern Air Command, Lieutenant General Sanjay Malik, General Officer Commanding 101Area, Maj Gen Rajesh A Moghe, VSM Vice Chairman Durand Cup Organising Committee, ki heh shipai kiba la rangbah ba kiwei ki kynrem ki lyndan. Ia kine ki lai tylli ki trophy la kaweh lama pyrda ban rah sha kylleng ha ka 10 tarik u Naitung da ka President badon burom ka ri India ka Droupadi Murmu ba la sdang na nongbah Delhi. U Maj Gen Rajesh A Moghe, VSM u la pdiang sngewbha ia u myntri rangbah ka jylla,ia ki heh ophisar, ki Military officer, ki nongbei tyngka bad ki nongpyniaid.
Haba ai jingkren u Conrad Sangma u la ong, “Ka Football ka dei ka jingialehka kaba jan baroh ki ieit bad ba ioh jingkyrshan bha ha Meghalaya bad ka long ka burom kaba khraw ia ngi ban ioh pyniaid ia kane ka Durand Cup ha ka sien kaba nyngkong. Nga kyntu ia baroh kiba ieit football ha ka jylla ban kin mih paidbah ban leit peitkai ia ka bad nga ngeit skhem ba kan pynbyrngia ia kiba bun da ka jingialehkai phutbol kaba itynnat hapdeng ki kynhun kiba khlain. Nga kitbok ia ka kynhun jong ngi ka Shillong Lajong, hynrei watla katta ngi khmih lynti ia ka jingialehkai kaba itynnat ha ki sngi kiban wan bad kitbok ruh ia baroh kiwei ki kynhun ba ia shim bynta ba kin ioh ia ka por kaba kmen ha nongbah Shillong. Nga sngewkmen ba ngi ioh ia ka jingiatrei lang hapdeng ka Indian Army bad ka sorkar jjylla na ka bynta ka jingtei ka JN Stadium.”
Ka Jawaharlal Nehru Stadium kan ioh ban pynlong ia ka jingialehkai jong ka Group F kaba kynthup ia ka club na ka thain ka Shillong Lajong FC, ki club Indian Super League ka FC Goa bad ka Hyderabad FC, kumjuh bad ka Tribhuvan Army Football Club na Nepal. Ka jingialehkai kaba nyngkong yn iakhun hapdeng ka Shillong Lajong FC bad ka Tribhuvan Army FC haka 2 tarik u Nailar. Ka jingialehkai kan sdang ha ka por 4 baje janmiet. Baroh ki jingialehkai jong ka IndianOil Durand Cup yn pyni LIVE ha Sony Sports Network bad ha SonyLiv OTT platform. Baroh 24 tylli ki kynhun ki don ba ia shim bynta, kynthup ia lai tylla na ki services team bad ar tylli ki Services team na Nepal bad Bangladesh, yn ioh ban sakhi barh 43 tylli ki jingialehkai ha kylleng ka ri, ban ialehkai ha ki saw tylli ki nongbah, ha Kokrajhar, Shillong, Jamshedpur bad Kolkata, ka grand final kan long ha ka 31 tarik u Nailar ha Vivekananda Yuba Bharati Krirangan (VYBK).
