U Myntri Kam Pohiing bad Cooperation jong ka Sorkar Pdeng, Amit Shah u la iashim bynta ha ki jingiatainia ha baroh artylli ki iing dorbar thawain jong ka Parliament mynta ka sngi halor ka jingtwa khyndew ha Wayanad, Kerala.
Ha ka jingkren shaphang ka jingjia ba sngewsih ha Wayanad ha baroh artylli ki Iing Dorbar Thaw Ain, u Shah u la ai ka jingsngewlem ia kito kiba la duh ia ka jingim bad u la ong ba u kyrmen ba kito kiba la mynsaw kin ioh kloi ka jingkoit jingkhiah. U la ong ba ha kane ka por jong ka jinglynshop, ka Sorkar u Narendra Modi ka ieng skhem bad ki briew jong ka Kerala bad ka Sorkar Kerala. U Shah u la ong ba ka Sorkar Modi ka dang leh ia kaba donkam ban pyllait im, ai jingiarap bad jaka sah ha Wayanad.
U Myntri u la ong ba shuwau 2014, ka rukom treikam jong ka India ka dei ban pyllait im ia ki briew haba don ka jinglynshop ki bor ka mariang, hynrei ka Sorkar Modi ka trei ban pynthikna ba ym don ka jingduh ki jingim briew. U la ong ba ka dei ka kamram jong ka Sorkar Jylla ban ialam ia ki briew sha ki jaka ba kham shngain ha ka por kaba biang katkum ki jingai jingtip na ka Sorkar Pdeng. U Shah u la ong ba ka Sorkar Pdeng ka la leh lut ia kaba donkam ha ka kam pyllai tim ia ki briew ha kane ka por bad ba u Myntri Rangbah Duh, Narendra Modi u dang peit ia ka kam kaba dang iaid bad u dang ioh jingtip mardor shaphang ka kam ban pyllait im ia ki briew ha Wayanad.
Hashuwa kane, ha ka jingiakren shaphang kane ka kam ha Rajya Sabha, u Shah u la ong ba ka ka 23 tarik u Naitung, hynniew sngi shuwa kane ka jingjia ba sngewsih, ka Sorkar Pdeng ka la ai jingtip lypa ia ka Sorkar Kerala bad hadien kane, la ai jingtip biang ha ka 24 bad 25 tarik u Naitung, 2024. U la ong ba ha ka 26 tarik u Naitung, la pyntip ia ka Sorkar Kerala ba yn don ka jinghap slap kaba 20 cm ha kane lah ban don ki jingtwa khyndew ka ba lah ban ialam sha ka jingduh ki mynsiem briew bad ki jingdon jingem. U la ong ba lada kito kiba kynnoh ia ka Sorkar ki la pule ia ki jingai jingtip lypa, kam ym shym la long kumne.
U Myntri u la ong ba bun ki jylla kiba la iathuh ba ym shym la duh jingim briew lane ka jingduna ka jingduh jingim briew haba don ka jinglynshop ki bor ka mariang namar kane ka lad ai jingtip lypa. U la ai nuksa da ki jingjia ha Odisha bad Gujarat. U la ong ba la ai jingtip lypa ia ka Sorkar Odisha shaphang ka eriong hynniew sngi shuwa ka jingjia, bad la duh tang kawei ka jingim briew. U la ong ba la ai jingtip ia ka Gujarat lai sngi shuwa ka jingjia bad ym don wat uwei u mrad ruh ba la mynsaw.
U Amit Shah u la ong ba naduh u 2014, ka Sorkar India ka la pynlut T 2,323 na ka bynta ki lad ai jingtip lypa ban pynthikna ia ka jingshngain jong ki briew bad ba la ai jingtip ia baroh kiba iadei bad kane ka kam. U la ong ba la ai jingtip ia baroh ki jylla bad ki UT, shi taiew shuwa ki jingjia bad ba baroh ki lah ban peit ia ki jingtip ha ka website.
U Shah u la ong ba hadien ba u Narendra Modi u la shimti kum u Myntri Rangbah Duh ha u 2014, la treikam ban tei ia ka lad ai jingtip lypa ba biang tam ha ka pyrthei. U la ong ba ka India ka dei kawei na ki saw ne san tylli ki ri ba donbor tam ha kaba iadei bad ka jingioh jingtip lypa shaphang ki jinglynshop, hynniew sngi shuwa ba kin jia. U la ong ba bun ki ri ki lah ban ioh jingtip lypakumne tang lai sngi shuwa ki jingjia.
U Myntri u la ong ba ki lad ioh jingtip lypa ki don ban ai jingtip shaphang u slap, ki eriong, ka jingkhluit, ka jingkhriat, ki tsunami, u jumai, jingtwa khyndew bad ka leilieh. U la ong ba lada ka liang pyrshah kam tip shaphang ka lad ai jingtip lypa, kane kam bha, hynrei lada ki la tip bad ki leh politik ia kane, ka long kaba sngewsih bha. U la ong ba bun ki jylla ki la pyndonkam ia kane bad ba
U Shah u la ong ba u la ai jingbit ia 9 tylli ki kynhun NDRF kiba la pynpoi da ki liengsuin sha Kerala da ka Sorkar India ha ka 23 ki jaka ba don jingma. U la ong ba lada ka Sorkar Kerala ka la trei kham sted, bun ki briew kin la lait na ka jingiap.
U Amit Shah u la ong ba ki jylla ki lah ban ai hi 10 per cent ka fund na ka SDRF bad pyndonkam lut ia kane da kaba bud ia ki kyndon, khlem da pan jingbit na ka Sorkar Pdeng. U la ong ba la sanction T 6,244 klur na ka bynta ka West Bengal naduh u 2014 haduh 2024. Na kane, la pyllait pisa T 4,619 klur haduh mynta.
U Myntri Kam PohIing u la ong ba ha ryngkat ki 9 tylli ki battalion jong ka NDRF ba la phah ha ka 23 tarik u Naitung 2024, la phah shuh sa lai battalion hynnin ha sngi. U la ong kane ka dei ka por ban iadonlang bad ka Sorkar bad ki briew jong ka Kerala. U Shah u la ong ba ka Sorkar Modi ka ieng skehm bad ki briew bad ka Sorkar Kerala ha kane ka por jong ka jingeh.
