Lum u CEO ban ïakren halor ka jingpynkhreh ilekshon MP

U Chief Electoral Officer (CEO) ka Jylla Meghalaya u Dr BDR Tiwari, u la lum ia ka jingialang bad baroh ki Political party ka Jylla kum shibynta ban iakren halor ka jingpynkhreh ia ka ilekshon Lok Sabha ka ban long ha ka 19 tarik Iaiong. Haba iakren bad ki lad pathai khubor, u Tiwari ula pyntip ba kane ka jingialang ka dei kaba la pynlong haba iadei bad ka jingpynbeit ia ka por ba ki Political party kin pathai ia ki khubor jong ki ha ka All India Radio bad ka Doordarshan.

“Namar kata, yn sa ai ia ka voucher jong ka por da ka Election Commission of India ia ki National bad State Political party bala ithuh” la ong u Tiwari. U CEO u la pyntip ruh ba ka jingialang bad ki Political Party ka long ruh ban batai ia ki ba kumno ki lah ban ioh ia kane ka jingai por jong ka ECI ba kin pathai ia ki khubor jong ki sha ki paidbah na kine ki lad pathai.

U la pyntip ba namar ka jingwan ka aiom slap, la bthah ia ka Tnad Education bad ka Revenue & Disaster Management ba kin shim ia baroh ki sienjam ba donkam haba buh ha ka jingmut jingpyrkhat ba kiba bun ki Polling Station ki dei kiba la pynlong ha ki skul. “La bthah ruh ia u Chief Secretary ba un shong bishar halor kane ka kam bad ki Tnad ba don bynta” ula ong.“Ngi kwah ban pynthikna ba ka leit ka wan kam dei ban shah ktah bad ba dei ban pynbiang ruh ia ki jaka rieh slap bad kiwei kiwei ki jingdonkam ha baroh ki Polling Station” ula ong.