Ki paitbah nongrep na ka thain Riwar Sepngi jong ka South West Khasi Hills District ki la pynpaw ia ka jingsngewsih kaba jur halor ka jinghiar dor shaba palat ki mar rep ba la pynmih da ki nongrep napoh ka thain khamtam u synsar, ka ‘latyrpad, u kwai, ka tympew, u sohmrit bad kiwei kiwei ki mar rep, kaba la ktah haduh katta katta ïa ka ioh ka kot jong ki bad buh jingeh ruh ia ki ban pyndap pynbiang ia ki jingdonkam ha iing ha sem bad ban phah ïa la kijong ki khun ki kti sha skul. Katkum ka jingiathuh jong ki paitbah nongrep na ka thain Manad, South West Khasi Hills District, la ong ba ka dor jong u synsar ha ki snem ba la dep ka poi haduh T.130 shi kilo hynrei kaba sngewsih mynta pat ka long ba u poi tang T.30 tyngka shi kilo, u kwai T.1200 shi kani mynta u poi tang T.150 haduh T. 200 shi kani, u sohmrit ula hiar na ka T.700 haduh T. 800 shi kilo sha ka T.500 shi kilo bad kane ka jinghiar dor ka long ruh ia ka ‘latyrpad bad kiwei pat ki mar rep.
Ha kaba ïadei bad kane ka jinghiar dor ki marrep mar riang ki paidbah nongrep jong ka Manad San Shnong Area kiba kynthup ïa ka shnong Manad, Mawbidong, Pynden Lyngdoh, Lummawbah bad Pynden Sohlang kiba ki paidbah nong shong shnong shispah na ka shispah kidei ki nongrep ki la pynpaw ïa ka jingsngewdiaw kaba khraw ha kaba ïadei bad kane ka jinghiar dor ki marrep marriang katba ka ki marbam mardih kiba wan na kiwei ki jaka kum u khaw, shini, phan, piat ki la nang kiewdor man ka sngi. U Bah Redy Shylla u Chairman, Synjuk Rangbah San Shnong Manad Area Manad San Shnong Area haba kren bad ki lad pathai khubor u la ïathuh ba ki nongrep jong kane ka dong ka thaiñ ki don mynta hapdeng ka jingkyrduh kaba khraw namar ki marrep jong ki kim iaid dor shuh. Bun ki nongrep ïa u Synsar bad u Sla tyrpad uba ki la kheit kim treh shuh ban die bad u la shu pyut kai ha ki jaka buh namar ka jingtad dor shaba palat ha kaba tang ka bai bylla bad bai kit ruh kam mih shuh .
U la pynpaw ruh ba lada kan dang ïai long kumne ha kaba ki marrep jong ki, kin dang ïai hiar dor na kapor sha kapor katba ki marbam mardih kin dang kiew man ka sngi, khlem pep ha kawei ka sngi ki paidbah nongrep kin sa don hapdeng ka jingīap thngan. Kumta na ka liang ki paidbah nongrep jong kane ka dong ka thaiñ ki kyrpad jur ïa ka sorkar kumjuh ruh ïa ka myntri ba dei peit ïa ka rep ka riang ba kin leh eiei bad thaw lad thaw lynti ha kaba ïadei bad kane ka jingeh ki nongrep, khnang ba kam rep kam riang kan nang kiew nangne shaphrang.
