U Symbud Myntri Rangbah ka jylla u bah Sniawbhalang Dhar ula iathuh ha ka iing Dorbar ba ka sorkar ka la map shwa ia kiba wai dukan namar ba dang khang ka Inter-State Bus Terminial (ISBT). Ia kane u Symbud Myntri Rangbah ula jubab ha ka Zero Hour ba la wanrah da u MLA ka VPP na Mawlai konstiwensi u bah Brightstarwell Marbaniang. U MLA ka Mawlai uba la wanrah ia kane ka mat, ula ong ba ka jingshna ia ka jingkieng Umiam 7 bnai, ka la ktah ia ki nongshong wai dukan ha ISBT namar ka jingbym wan ki bos ha ISBT. “Ka jingbym wan ki bos ha ISBT ka la ktah ia ki nongshong dukan kiba im ja na kane ka kam,”ula ong. U la buh jingkylli la ka sorkar ka don jingthmu ban iarap ia ki trai dukan kiba shong ha ISBT. Halor kane, u bah Sniawbhalang u la ong ba ka ISBT kaba don ha Mawlai, Mawiong ka dang khang shwa namar ba dang khang ban iaid ki bos na jingkieng Umiam.
Ula iathuh ba ka sorkar ka la map shwa ia kiba wai dukan namar ba dang khang ka ISBT.U bah Sniawbhalang ula ong ba shwa ban khang ia ka jingkieng Umiam, ki don 29 tylli ki bos kynthup 12 tylli ki State Transport Corporation, 6 tylli jong ka Meghalaya Transport Corporation bad 6 tylli jong ka Assam State Transport Corporation bad Arunachal Pradesh State Transport Corporation nalor 17 tylli ki bos kiba la pyniaid ki riew shimet. U Symbud myntri Rangbah ula pyntip ruh ba ki don ki dukan 12 kiba la dep ai wai bad bad 12 ki dang sah thylli bad ka jingthmu ban khot tender ia kine ki dukan ba dang thylli la pynsangeh shwa namar ba dang khang ka ISBT.
Ula pyntip ruh ba ka jinglum khajna na ISBT naduh ba sdang haduh mynta ka la kot sha ka T.34 lak tam katba ka jinglum khajna na ki dukan ka long T.5 lak tam. Lah ban kdew ba ia ka ka ISBT la tei ha Mawlai Mawiong ha ka jinglut kaba T. 48.31 klur na North Eastern Council (NEC) ha u snem 2015 bad na kane, ka sorkar Meghalaya ka hap ban sei T.4.8 klur katkum ka jingbei pisa kaba 90:10 hapdeng ka sorkar pdeng bad ka sorkar jylla. Ka jingheh ka ISBT ka long 53.41 Sq. km bad la plie u myntri ka tnad kam pohiing ka ri u Amit Shah ha u snem u Naitung 2021 bad la pyntreikam ha u 2022 hapoh ka jingpeit ka Meghalaya Transport Department.
