Ka North East Students’ Organisation (NESO) ka synjuk ki samla pule ka thain shatei lammihngi ka la kyntu ïa u Myntri Rangbahduh ka Ri u Narendra Modi ban pynkut noh ïa ka jingsngap jar jong u bad ban leit jngoh ïa ka jylla Manipur, kaba la mad ka jingiaum snam ha ki 16 bnai na ka jingiakynad iapher jaidbynriew bad ban thung ia ka High Level Peace Committee ban wanrah ia ka shongsuk shongsain ha jylla Manipur. “Ngi kyntu ia u Myntri Rangbahduh ka Ri ban pynkut noh ka jingsngap jar bad ban leit jngoh ïa ka Manipur ban peit dalade ïa ka jinglong jingman bad ban ai jingïada ïa ki baroh ar ki jaidbynriew khamtam ïa ki kynthei bad ki khynnah kiba la shah ktah na katei ka jingiakynad. Ki paidbah ka Manipur ki la mad ïa ka jingeh bad jynjar bad ki kloi ban pdiang ki lad jingiarap ban pynkut noh ia katei ka jingiaum snam” la pynpaw u Chairman ka NESO u Bah Samuel B Jyrwa ha ka shithi ba la phah sha u Myntri Rangbahduh ka Ri. Ka NESO ka pynpaw ka jingsngap jar u Myntri Rangbahduh ka Ri ba ym shym la leit sha Manipur naduh ba sdang haduh mynta ka la nang pynjur ia ka jingiakhih ha ka jylla. Ka jingbym tuklar ki nongialam ka long kumba ai lad ia ka jingiakynad ban nang jur bad ki paidbah ki la mad ia ki jingjynjar.
U Bah Samuel ula ong, “Ka jinglong jingman ha Manipur ka la nangsniew bad ka dawa ban shimkhia mardor na ki kyrdan kiba ha khlieh duh jong ka sorkar. Ka jingbym lah ban pynbeit ia ka jingiakynad kam pynthud tang ia ka jinglong skhem jongka sorkar Manipur hynrei kala buh ruh ha ka jingma ia ka jingsuk bad jingshngain ha ka thain shatei lammihngi baroh kawei”. Ka NESO ka kyntu ia ka Sorkar India ban leh eiei noh mardor bad ban shim ïa ki sienjam ban wanrah biang ïa ka jingsuk jingshngain ha ka jylla bad ban shimkhia mardor khlem da pynslem shuh bad ban shim ïa ki sienjam kiba biang ban wanrah biang ïa ka suk ka sain ha ka jylla. “Ka NESO ka kyntu ruh ban thung ïa ka High Level Peace Committee, kaban kynthup ïa ki nongmihkhmat na baroh ki jaitbynriew, ban plie lad ban shim ia ka rai kaban wanrah ia ka jingiapynbeit kaban neh” la pynpaw u Bah Samuel bad ka bynrap, ba kane ka jingïakynad kaba la slem bha kala wanrah ïa ka jingduh ïa ki jingim ia kaba ym lah niew shuh, ka jingpynjot pynpra ia ki jingdon jingem bad pynmih ïa ka jinglong jingman jong ka jingsyier ha kylleng jong ka jylla.
Nalor kane, ka NESO kala pynrem jur ïa kine ki kam iaumsnam namar ki pynsniew bad ki long pyrshah ïa ki nongrim jong ka longbriew manbriew, jingsuk bad ka jingïalong kawei. Ka jingjur jong ki kam thombor, kynthup ïa ki jingjia ba la mih khubor dang shen, shaphang ki kam thombor da ki Drone bad ki Missile, kala nang pynsniew shuh shuh ïa ka jinglong jingman. Kine ki buit kim pynjur tang ia ka jingpynjot hynrei ki pynngam jylliew ruh ia ka jingphiah hapdeng ki jaidbynriew, ban pyneh ban ioh biang ia ka jingsuk. Ka NESO ka ieng bad kito baroh ki riewshimet bad ki longiing longsem kiba la shah ktah bad ka sngewsih ruh halor ka jingduh noh ia ki mynsiem ba lui-lui. U Bah Samuel Jyrwa ula pynpaw ba ka NESO ka iengskhem na ka bynta ka jingsuk bad hok ha Manipur bad ka thain shatei lam mihngi baroh kawei. “Ngi ngeit ba ki kam thombor kam lah satia ban long ka lad ban weng ïa kano kano ka jingïakynad bad ngi wer ïa baroh ki jaidbynriew bad baroh kiba iadonbynta lang ban pdiang ïa ka jingïakren bad ban ïatreilang ban pynneh pynsah biang ïa ka shongsuk. Ka NESO ka ieng bad ka kloi ruh ban ïarap ia kino kino ki jingpyrshang kiba tei ban pynbeit ïa ka jingeh kaba dang don mynta bad ban pynthikna ïa ka lawei kaba skhem bad kaba shngaiñ ia ka Manipur,” la pynkut u Chairman ka NESO.
