Man ka por da niew vote ha ka MP ngi shah rem namar ngim ia tylli: Metbah

U President ka United Democratic Party u bah Metbah Lyngdoh haba kren ha ka jingialang ialap election ia u kyrtong iamonlang ka Regional Democratic Alliance kaba dei ka kynhun iasynroplang ki seng riewlum ha ka jylla Meghalaya kiba kynthup ia ka UDP bad HSPDP ula ong, ba man ka por yn da la niew ia ki vote ha ka MP election ka UDP ruh ka shah rem ka HSPDP ruh ka shah rem bad ka daw ka long namar ba kim don ka jingiatylli hapdeng jong ki, kaba la pynlong ruh ia ki paidbah ba kin ym sngewtynnad ban iohi ia ka jingbym iatylli ki seng riewlum bad dei kane ka la  pynlong ia ki paidbah kiba ju kyrshan ia ki seng riewlum ha ka MLA election ba kin kyrshan ia ki National Party ha ka MP election.

U bah Metbah u la ong ruh ba ha kane ka kynti kaba mynta kine ki seng riewlum ki la pynhun ia ka jingangud jong ki paidbah ka jylla kiba baroh shikatta ki la khmih lynti ban iohi ia ka jingiatylli jong kine ki seng riewlum khnang ba kin ioh ban synshar hi ia ka jylla bad mynta ka dei sa ka pali jong ki paidbah pat ban iatylli haba kine ki seng ki la ia tylli kawei.

U la ong ruh ba lada baroh ki paidbah kiba la kyrshan ia ka seng UDP bad HDPSP ha ka MLA Election ba dang shu dep kin kyrshan lut ia u kyrtong ka RDA ha kane ka MP election, u bah Robertjune Kharjahrin khlem pep un long u nongjop hynrei u la ong kum ka Alliance ka khot bad wer ruh ia ki nongkyshan jong kiwei pat ki seng sainpyrthei ba kin ai ia ka jingkyrshan ia u kyrtong ka RDA ha kane ka MP election.