Mang ka sorkar T.2.33 klur ban pynkylla dur ia ka State Central Library

U Myntri Rangbah ka Jylla u Conrad K Sangma ha ka jingdonlang u Myntri ka Tnad Arts & Culture u Bah Paul Lyngdoh u la buh mawnongrim ban pynkylla bad shna pynwandur thymmai ia ki jnit ki jnat ba pynitynnad ia ka State Central Library, Shillong.
Haba kren ha ka jingialang, u Conrad u la pyntip ba ka Sorkar ka don jingthmu ban trei da ki jingtei ba thymmai ia ka Soso Tham Auditorium ha kine ki snem ba la lah hynrei kam shym la lah namar ka jingdon ka Covid.
U Conrad ula ong ba kane ka jingtei thymmai kan ai jaka ban buh ia ki jingdonkam ka juk ba mynta bad kan pynkylla dur ia ka Library kum ka jingtei kaba kynsai bha bad u la ong ruh ba ka Sorkar kan pynkup ia ka dur thymmai ia ka State Library Complex baroh kawei bad kan buh ruh ia ka Cineplex lem bad ki rynsan ban leh drama bad kiwei kiwei.
U Myntri Rangbah ula kular ruh ia ka song pisa na ka bynta kiwei ki project kiba hap hapoh ka State Library Complex.
“Kane ka dei ban long ka centre kaba ki samla ba don sap ki lah ban iakynduh, iasam ia ki jingnang jingtip bad ban pyni ia ka sap ba ki don sha ka pyrthei bad ban pynlong ruh ia kane ka jaka kaba jia, kaba im bad ka hui hui ha kaba kiba bun jait ki prokram art & culture yn lah ban pyni bad iasam mar kylliang” ula ong.
U Myntri Rangbah ula ong ruh ba hapoh ka CM Elevate, ka Sorkar kan buh haduh 30 tylli ki movie theatre ha kylleng ki jaka jong ka Jylla ban kyntiew ia ka art & culture, ki phlim bad ka ktien ka thylliej jong ka Jylla nalor ban ai rynsan ia ki nongshna phlim ka Jylla ba kin pyni ia ki kam ba ki trei.
Haba pynpaw ba ka 6 tarik Lber 2024 ka dei ka sngi dap shisnem jong ka Sorkar MDA 2.0 bad hynriew snem ka Sorkar MDA, u Myntri Rangbah ula ong ba ka Sorkar kala buh ia u mawnongrim ka jingkiew irat bad ka roi ka par bad wanrah ruh ia ki prokram ban pyntyllun shakhmat ia ka Jylla. Ula pynpaw ruh ba da ka jingshaniah lang jong u paidbah, ka Sorkar kan lah ban pynurlong ia ki jingangnud jong ki paidbah ka Jylla.
Naka liang u Myntri ka Tnad Arts & Culture Bah Paul Lyngdoh u ai khublei ia ka National Library Board halor ka jingbei pisa ba T.2.33 klur ban pynitynnad bad pynheh ia ka State Library Complex.
U Bah Paul ula ai khublei ruh ia u Myntri Rangbah halor ka jingai ia ka thong bad ka mishon ban pyntyllun shakhmat ia ki shaka ka roi ka par jong ka Jylla.