U MLA ka seng BJP u Bah Sanbor Shullai hynne ka sngi mar ia dep wan jurip ia ka thain khappud ula leit mardor ban iakynduh ia u Lat ka jylla u CH Vijayashankar ha Raj Bhavan, ban pyntip ia ka jinglong jingman ha ki thain̈ khappud ka jylla Meghalaya bad ka ri Bangladesh. Ha ka jingiakynduh ia u Lat ka jylla u CH Vijayshankar ha Raj Bhavan, la iadonlang u President ka BJP Meghalaya u Rikman G Momin bad kiwei kiwei ki nongialam ka BJP. Haba iakren bad ki nongthoh khubor, u Bah Sanbor ula iathuh ba ula wan beit beit na khappud ban leit ai iaka kaiphod sha u Lat ka jylla ban pyntip ba haduh mynta ki paidbah ki shongsuk shongsaiñ hynrei ym lah pat ban tip ia kaei kaban jia ha ki sngi kiban wan ha ki sngi ban wan.
Ula iathuh, ba na ka liang jongu Lat ka jylla ula pynthikna ba yn lum mardor ia ka jingialang bad ki heh ophisar bad ba kin phah ia ka khubor ba dei ban pynjur shuh shuh ia ka jingpahara ki shipai ha ki thain khappud ioh don kano kano ka jingwan tur jubor ne rung beain ki nong Bangladesh sha Meghalaya. U Bah Sanbor ula ong ka Sorkar Jylla, ka Sorkar Pdeng, ki BSF haduh ki shipai kila long kiba la pynkhreh ban iakhun pyrshah ia ki nong Bnagladesh kiba wan rung be-aiñ bad la iakren ba dei ban pyndonkam da ka bor katkum ki ain ki kanun bad lada donkam dei ban siat ne wat ban hiar thma ruh.
Hashwa ba u Bah Sanbor Shullai yn leit iakynduh ia u Lat ka jylla haka por janmiet, naduh ka por mynstep ula leit jurip ia ka thaiñ Dawki bad ha ka shnong Pyrdiwah ha kaba la iadonlang ki heh ka seng BJP bad ki heh shipai BSF. U Bah Sanbor ula leit iakynduh ia ki heh BSF ha Dawki BoP bad ula leit peit ruh ia ka jinglong jingman jong ka Integrated Check Post kaba don ha Dawki bad hadien kane ula leit sha Pyrdiwah ban iakynduh ia ki nongialam shnong bad ia ki nongshong shnong ban iakren bad ki bad ban ioh ia ki jingtip kiba bniah ia ka jinglong jingman ki paidbah kiba sah ha khappud.
