Ki MLA ka Voice of the People Party (VPP) kiba don ha ka liang pyrshah ki la mih jyndat na ka iing Dorbar hynne ka sngi ha ka por ba jubab u Myntri ka tnat pule halor ka jingthung kam nonghikai ha Dadenggre Sub-Division. Kane ka jingmih jyndat ki MLA ka VPP ka dei ban pyrshah ia ka rai ban ai lad ia u Myntri ka tnat Pule Puthi u Rakkam A Sangma ban jubab hapoh ka iing dorbar halor ka Short Duration ba la wanrah da u MLA ka Nongkrem Ardent M Basaiawmoit halor ka jingthungkam Nonghikai ha Dadenggre Sub-Division. Kane ka sienjam ba shim ka VPP ka dei ruh namar ka jingbym leh eiei ka Sorkar pyrshah ia u Myntri Sorkar Rakkam A Sangma halor ka jingkynnoh ba u don bynta ban kren shun ia ka Party bad kumjuh ban kynshoit pyniapher jaidbynriew hapdeng ki Khasi bad Garo. Hadien ka jingiashim da ki dkhot ka iing dorbar, u Symbud Lamphang u Timothy D Shira ula rai ban ai lad ia u Myntri ka tnat Pule Puthi u Rakkam A Sangma ba un jubab ia ka Short Duration.
Mar sien ieng u Myntri Sorkar Rakkam A Sangma, Bah Ardent lem bad ki 3 ngut ki MLA ka VPP ki la ieng na shuki bad mih noh shabar ha ryngkat ka jinghylla “khlem ka rain ka rem, khlem ka rain ka rem”. Ha shuwa ban iamih shabar ka iingdorbar, u Bah Ardent ula ong “Ngan ym sngap satia ia u Myntri ka tnad Pule da kaba ong ba ka jingkren shun jong u ia ka VPP bad ka jingkynshoit pyniapher jaidbynriew ka dei ka jingpynkhein ia ka 196 jong ka BNSS. Lada u Myntri Rangbah lane uwei napdeng ki 2 ngut ki Symbud Myntri Rangbah kim jubab, ngan ym sngap satia”.
U Bah Ardent ula pynpaw ruh ba ka VPP kam kwah ban iakren bad uno uno u briew lane bad u Myntri Sorkar uba thmu ban kynshoit pyniapher jaidbynriew. “Ngim kwah ban don ka jingiakynad hapdeng ki Khasi bad Garo. Ka jingkren jong u Myntri sorkar Rakkam A Sangma ka la ai ding ban iashun hapdeng ki ar jaitbynriew ka Jylla” u la ong. Ha shuwa kane u Symbud Myntri Rangbah u Bah Prestone Tynsong ula ong, ba ka Rules jong ka iing dorbar ka kren shai ba u dkhot haba ai jingkren, um dei ban kynnoh shimet pyrshah ia ki dkhot ka iing. U Bah Prestone u la ai jingmut ruh ia u Nongialam ka VPP ban ai lad ba ka ain kan iaid ha la ka jong ka lynti namar la dep ban ujor da ka ejahar pyrshah ia u Myntri Sorkar.
