Mih ki nongtrei sorkar ban leit sha ki Polling Station, pynthikna u DC ka ilekshon kan ïaid beit

Hashwa ba ki paidbah kin leit ban jied ïaki nongmihkhmat sha iingdorbar thawaiñ ha Parliament kata haka 19 tarik, Ïaiong, ki nongtrei ka sorkar na Ri-Bhoi District kiba kynthup naduh ki Returning Officer, ki Sector Officer bad ki Zonal Magistrate mynta ki la pynkhreh ïa ki tiar ki tar bad sdang ban mih na Nongpoh ban leit sha ki Polling Station kiba kham jngai ban pynpoi ïaki tiar ki tar naka bynta ban pynkhreh iaka elekshon ban jied ïaki MP.
Kine ki Ophisar bad ki Nongtrei sorkar ki la pynkhreh ban mih mynta ka shiteng sngi ban leit sha miet lypa sha kito ki Polling Station kiba hap hapoh ka jingpeit jingkhmih jong ki.
U District Election Officer ka Ri-Bhoi u Arpit Upadhyaya u la ïathuh ba ka jingpynkhreh naka liang ka Sorkar halor ka jingjied ïaki MP ka ban long haka 19 tarik ïaiong ka la nang ïaid shaid shaid bad ki la long kiba pynkhreh naka bynta katei ka sngi. U la ïathuh ruh ba khnang ba kan nym don kano kano ka jingpynthud naka liang ka Sorkar ka la pynkhlaiñ ïaki bor pahara khnang ba kan nym ktah ïaka shong suk shongsaiñ ki paidbah bad ban pyntikna ruh ba ki paidbah kin ïoh ban ïa shim bynta laitluid ha katei ka sngi khamtam haki jaka khappud.
Shuh shuh u la ïathuh ba hapoh Ribhoi District ki kumba 31 tylli ki Polling station kiba kham don jingma lane kita ki Critical and Vulnerable bad 4 tylli kiba don jingma lane ki Vulnerable, ban pyntikna ïaka jingshngaiñ ïa ki paidbah ha kitei ki jaka naka liang ka Sorkar ki la pynkhlaiñ ïaki bor pahara da ki shipai CRPF, ki pulit bad kumjuh ruh ki Home Guard.