Kumba juh leh kyrpang man u snem ha kum kane ka sngi ki bor District ka West Jaiñtia, ka Jowai Municipal Board, ki bor pyniaid ia ki iew bapher ha Jowai kumjuh ki dorbar shnong bapher ka shnong Jowai ki juh pynlong ka jingpynkhuid paidbah ia ki iew ki hat, ki shnong ki thaw, mynta u snem ruh la pynlong ka jingpynkhuid shnong ki iew da ka jingshim bynta naduh ki khynnah ryngbah kynthei bad shynrang. Ha ka jingialang lyngkot ba pyniaid da ka ophis u Deputy Commissioner, West Jaiñtia Hills District ryngkat ka Jowai Municipal Board, ki Market committee jong ka Seiñraij, iew Shyiap, iew CNI bad ka dorbar shnong Tympang Iawmusiang haka por step shwa ban sdang ka jingpynkhuid paidbah ha Iawmusiang, ka D.V. Lyngdoh Additional Deputy Commissioner, West Jaiñtia kaba dei ruh kum ka CEO ka Jowai Municipal Board, kala ai ki jingkren lamkhmat haka jingiadei bad kane ka sngi kumjuh ruh halor ka jingkordor jong ka khuid ka suba.
U President ka Seiñraij Jowai u H.Toi haba kren u ong, kane ka sngi ka pynkynmaw ban long kiba lehkhuid ym tang haka met ka pat hynrei wat haki sawdong sawkun khnang ban ioh iaka koit ka khiah. Bad ka jinglong kyrpang kane ka sngi ruh ymdei ban kynmaw tang iaka jinglehkhuid, hynrei ia kiwei pat ki bynta ba u Mahatma Gandhi ula hikai lyngba ki jingthoh jingkren jong u, kiba long kum ka jingai mynsiem iaki briew ban long kiba im hok im khuid khlem da pynmong ia kiwei la daka kam ne ka ktien thylliej. Na ka liang u waheh shnong Tympang Iawmusiang u Ajoy Lywait haba kren u kyntu ia baroh kiba shong iew ban long kiba lehkhuid namar ka jingsma kan ktah nyngkong iaki hi kiba kamai ja kpoh ha iew.
Nangta u kyntu ruh iaki paidbah ba kim dei ban wan bret ha Iawmusiang iaki niut na mih napoh ki iing ki sem jong ki. Ha kane ka sngi nalor ba sakhi iaka jingpynkhuid paidbah ha iewthymme, iew CNI, iew Shyiap, iew Seiñraij bad kiwei, la sakhi ruh iaka jingshim bynta ki paidbah ban pynkhuid iaki lynti syngkieng ki sawdong sawkun ki ïing ki sem, ha kaba don ki shnong kiba la pynbeit bad ia mih paidbah, don pat ki shnong ba shu ia mih hi ki briew ban pynkhuid iaki sawdong sawkun kumjuh ki surok lynti syngkieng.
