Ki jaitbynriew Biate ba hap hapoh ka MDC Saipung Constituency hynne ka sngi ki la mih ryntih sha ka public hearing ba la pynlong ha Khliehriat bad pynpaw ka jingpyrshah jur ha khmat ki dkhot ka Delemination Committee ka Jaiñtia Hills Autonomous District Council ha ryngkat bad u MDC jong ki u Arbor Hima Darnei lem bad kiwei pat kiba mihkhmat na ki kynhun seng bapher bapher.
Haba pynpaw ka jingpyrshah ki ong, ka Saipung Constituency dei kaba la ai nam kyrpang naduh u snem 1967 namar ba ka pher na baroh ki Constituency hapoh ka JHADC, nanar ba la shong la sah da ki jaitbynriew Biate kiba dei ki rit paid napdeng ki jaitbynriew Pnar, bad ki don ruh ka jinglong kyrpang ha ka riti dustur, ka rukom im bad ka ktieñ ka thylliej.
U MDC kane ka thaiñ u Arbor Hima Darnei haba kren u ong, naduh kitei ki por wat lada ym pat biang ka jingbun briew ruh hynrei u Governor ula ailad kyrpang ban don la ki jong ki nongmihkhmat khnang ban lah iada iaka jinglong jingman kine ki jaitbynriew.
Bad haki 60 tylli ki snem bala leit man haba don ka Delimitation ka JHADC ym ju don satia ba ktah iaka Saipung Constituency namar ki sngewthuh iaka jinglong jingman ka Saipung.
Pynban haka draff Delemination ba mynta la sdang ban pynpharia iaka Saipung, kumta ki dawa ba dei ban pynneh biang kumba kala ioh iaka jinglong kyrpang naduh u snem 1967.
Napdeng ki jaitbynriew Biate ba ai jingkren ha kane ka sngi ki ong ba ki kwah ban ioh la u jong hi u nongmihkhmat kumba juh long khnang ba kin suk ban pynsngew iaki jingeh ha u briew uba ki ia sngewthuh iaka ktien ka thylliej.
La sakhi ruh ba wat kiwei pat ki shnong bala shah pyniasoh lang bad ki Jaitbynriew Biate haka constituency thymmai ba ai kyrteng ka Saipung Nongkhlieh ruh kila pynpaw ka jingpyrshah ba dei ban ailad iaki Biate pra maki hi kumba juh long khnang ban ym mih kano kano ka jingiasngewpher kumjuh ruh ka jingiaknieh MDC kaba lah ban wanrah jingeh pat ia u paidbah haka ktien ka thylliej.
