Ka Food and Drug Administration dang shen ka la shah ia ki briew kiba la samla ne heh ka rta ban pyndonkam ia u electronic sikret uba don ia ka jingsma, da kaba ki la iohi ba ka jingdih ia kine ki kynja sikret ba don jingsma ki lah ban pynduna ia ka jingma kaba mih na ka jingdih ia ki duma kiba la ju dih baroh shi katta.
Ka FDA ka iathuh ba ka la shah ia ki saw tylli ki e-cigarette kiba sma menthol ba la pynmih da ka Njoy, kaba long ka kyrteng jong kine ki kynja sikret ba la shimti da ka komapay Altria kaba long ka kompany pynmih duma kaba heh bha, kaba die ruh ia u sikret Marlboro.
Ka jingainam ban pynioh ia kane ka rai kaba thymmai ka iaid sha ki kompany ba shna ia kine ki kynja sikret ne ki vaping company’ kiba la kam la slem bha ba ki mar ba ki pynmih kin iarap ban pynduna ia ka jingdih duma, ia kaba la kynnoh ba ka jingiap jong kumba 480,000 ngut ki nong U.S. man la u snem kadei na ka daw jong ka jingpang bampong, ka jingpang jong ki tor bad ka jingpang klongsnam. La die ia kine ki E-cigarette ha U.S. naduh ka snem 2007 hynrei ha kine ki snem ka jingioh nong na ka bynta ki nongdih ka la shah kah syrngiew now da ka jingpyndonkam jong ki khynnah kiba dang sdang khie samla bad kiba dang ha ki khat rta.
Ki kynhun jong ki kmie ki kpa bad kumjuh ki kynhun jong ki briew kiba pyrshah ia ka jingdih duma ki la kren pyrshah mardor ia kane ka rai, kaba la wan hadien bun snem ban pynbor ia ki nongpyniaid ain ban buh da ki jingdih kiba don bad ka jingmad menthod bad kiwei kiwei ki jingmad kiba lah ban khring ia ki khynnah kiba ka rta jong ki ka dang long ha ki khat.
“Kane ka rai ka lah ban wan sha kata ka jingong kaba ngin ym lah ban tehlakam ia ka jingkynrei ka jingdih jong ki khynnah samla ia kine ki jait jingdih duma,” ong ka Meredith Berkman, co-founder jong ka kynhun Parents Against Vaping E-cigarettes. “Ka FDA sa shisien kala ktah ia ki longing ka America da kaba ka la shah ia kum kane ka karkhana ba kan ioh ia ki nongthied ba shi jingim bad kiba long ki pateng ba bud- kata ki khun jong ka America.”
Ka jingtan jong ki samla ia kine ki jait jingdih duma ba la tip kum ka vaping ka la hiar na kaba ju kiew bha ha ki snem ba la dep, ha kaba kumba 10% na ki khynnah high school la ong ba ki pyndonkam ia ki e-cigarette myn shem snem. Napdeng kito kiba tan ia kine ki jait sikret, 90% ki pyndonkam da kito kiba don jingmad, ba kynthup ia u menthol.
Baroh ki e-cigarette kham ha shwa ba la shah ban pynmih da ka FDA kidei ki duma, ha kaba ym da bun ki khynnah samla kiba dih ia kine kiwei ki kynja sikret ne vape kin pyndonkam.
Ka Njoy kadei kawei na ki lai tylli ki kompany kaba la ioh ia ka jingmynjur kham mynshwa na ka FDA ban pynmih ia kine kiwei ki jait sikret bad la tip kum ki vape. Kum ba long kito kiwei ki kynja sikret, ar tylli na kum kine ki sikret ba la pynmih da ka Njoy kiba don ia ka jingmad menthol la shna kum I kynja synduk ne cartridge ia kaba lah ban plug ha kino kino ki tiar kiba lah ban pyndonkam biang ban pyn khluid ia ka nicotine kaba don hapoh, bad pynlong ia une u jingdih kum u kynja ba lah ban ring mynsiem. Ki ar tylli kiwei pat kiba kum kine ki jait sikret ne e-cigarettes ba la pynmih da ka Njoy kiba long menthol kidei kiba lah ban pyndonkam tang shisien.
