Ka iing dorbar jong ka KHADC ka la mynjur ban phah ia ka kaiphod jong ka Delimitation Committee sha ka Select Committee ban bishar bniah ban lait ka jingshah kynnoh ia ki dkhot ka iing. Ia kane ka rai la shim ha ka por ba u deputy CEM ka KHADC u Bah PN Syiem uba dei peit ia ka Elaka ula wanrah ia ka kaiphod jong ka Delimitation Committee kaba la aiti sha ka Executive Committee jong ka District Council ha ka 8 tarik mynta u bnai.
Lah ban kdew ka Delimitation Committee ka la shong bishar bniah halor ka jingthmu phiah ia ki Constituency ka la aiti ia ka kaiphod sha ka EC ha ka 8 tarik bad na ka liang ka EC ka la mynjur ban rah mynta ka sngi hapoh ka iingdorbar. Haba pynpaw ia ka jingbym pdiang ia ka kaiphod, u Nongialam ka Liangpyrshah u Bah Titosstarwell Chyne ula ong, “Ka EC ka la wanrah ia ka kaiphod hynrei ka khlem ai por ia ki dkhot jong ka iing ban pule bad bishar bniah”.
U Bah Titos ula ong, ba ka thong jong ka Delimitation Committee ka dei ban bishar ia ka jingdon paid ki nongthep Vote ha ki MDC Constituency hynrei haba peit ia ka kaiphod, ka Committee ka khlem kdew, katno ngut don ki nongthep Vote ha man ki Constituency. “Khnang ban ai lad ia ki dkhot jong ka iing ban pule bad bishar bniah shwa ia ka kaiphod. Ngi pynsngew hangne ba donkam ban phah shwa ia ka kaiphod sha ka Select Committee. Nga kwah ban pynpaw hangne ba ka jingbym pdiang ia ka kaiphod kam mut ba ngi pyrshah ia ka kaiphod” la ong u Bah Titos.
Haba pynpaw ia ka jingmynjur ia ka jingai jingmut ka Liangpyrshah, u deputy CEM u Bah PN Syiem ula ong “Ka iing ka pdiang ban phah ia ka kaiphod jong ka Delimitation Committee sha ka Select Committee”. Ki dkhot ka Select Committee ki kynthup, Chairman u deputy CEM ba khmih ia ka Eleka u Bah PN Syiem, u Nongialam ka Liang pyrshah u Bah Titosstarwell Chyne, u Bah Jambor War, u Bah Bindo Lanong, u Bah Lambor Malngiang, u Bah Balajied Rani bad u Secretary ka EC kum u member secretary.
