Mynjur ka Sorkar ban buh Fire & Emergency Service Station ha Rajabala

U Symbud  Myntri Rangbah ka Jylla u Bah Prestone Tynsong ula ong,  ba ka sorkar kala dep mynjur ban buh ia ka Fire & Emergency Service Station ha Rajabala West Garo Hills District lyngba ka Notification kaba la pynmih ha ka 8 tarik u Rymphang.Haba jubab ha ka Dorbar Mang Tyngka jong ka iingdorbar thawain u Bah Prestone uba khmih ruh ia ka Kam Pohiing ka jylla, ula ong ba katei ka sienjam kaba la shim da ka sorkar ka long kaba kongsan bha ban lah ban pynduna ia kino kino ki jingjia bad ba ki kali pynlip ding kin lah ban poi kloi ha ki jaka pluh.

U Bah Prestone ula pyntip ba ha u snem 2020-21, 2021-22 bad 2022-23 kila don 8 tylli ki jingjia pluh ding na Gomaijhora shaduh Rajabala bad ki kali pynlip ding kim shim la lah ban poi kloi ha ki jaka kiba pluh namar ka jingioh jingtip slem palat bad ka jingjngai jong ka jaka kaba pluh na ka jaka kaba don ki kali pynlip ding.

Ula pyntip ruh, ba kala don arsien ka jinghuri hura hapdeng ki paidbah bad ki pulit ha kine ki 3-4 snem kiba la leit namar ka jingpoi slem ki kali pynlip ding ha ki jaka ba don ka jingpluh. Katei ka jinghuri hura kala jia ha ka  Bhaitbari Bazar ha ka 25 tarik u Kyllalyngkot 2020 bad ha Rajabala Bazar ha ka 7 tarik u Iaiong 2023.