Mynjur ka Sorkar ban kyntiew tulop 6% ia ki nongtrei 108

Ka tnad ka Koit ka Khiah ka Sorkar Jylla ka la kular ban kyntiew 6 percent ka jingsiew na ka tulop ia ki nongtrei 108 hapoh ka Jylla. Ia kane la pyntip da u President ka Meghalaya Meghalaya EMRI Workers Union (MEMRIWU) u Bah Roipar Raswai hadien ka jingkynduh bad ka Myntri ka Koit ka Khiah Kong Ampareen Lyngdoh. Haba kren sha ki lad pathai khubor u Bah Roipar ula ong, ka jingialang mynta ka sngi bad ka Myntri ka Tnat ka Koit ka khiah, ka dei ban buddien halor ka jingialang bad u Managing Director (MD) ka National Health Mission (NHM) kaba la long ha ka 29 tarik Kyllalyngkot.

U Bah Roipar ula iathuh ba haka jingialang bad u MD, ka MEMRIWU kala dawa na u MD ban kyntiew iaka tulop ki nongtrei 108 katkum ka jingheh snem haka kam hynrei naka liang u MD u khlem lah ban shim rai.“Haka jingialang mynta ka sngi ka Myntri ka Tnat ka Koit ka Khiah ka Kong Ampareen Lyngdoh kala mynjur ia kane ka jingdawa ka MEMRIWU bad kala kular ha ngi ban sdang pyntreikam noh ia kane naduh u bnai Iaiong 2024” la ong u Bah Roipar. U Bah Roipar ula iathuh ba nalor ka jingdawa ban kyntiew iaka tulop, ka MEMRIWU kala iakren ruh bad ka Myntri ban bthah iaka NHM ban ai kiwei ki lad jingmyntoi iaki nongtrei 108 hapoh ka Jylla.

Ula iathuh ba ki don kumba 300 ngut ki nongtrei ka 108 bad haduh mynta mynne, ki nongtrei kim ioh ki lad jingmyntoi kum ka EF, ka shuti, ka Health Insurance bad kiwei kiwei. “Namar ba ka NHM kam don lad lynti ban pyntreikam ia ki jingmyntoi, ka Union kala ai jingmut haka Myntri ban ai Contract sha kiwei ki Company napoh ka Jylla kiba lah ban pyntreikam iaki lad jingmyntoi naka bynta ki nongtrei” ula ong.