Ha ka jingjia tyngkhuh kali, lai ngut ki briew ki la mynsaw jur hadien ba kawei ka Maruti Alto kaba la kynnoh niah stet da u nongniah ka la leit ban tynrah na ki bynta ba shadien jong kawei ka trok kaba ieng harud u surok bah NH-06 ha Umdihar, Ri Bhoi District.
Katkum ka khubor ba la iohlum, la iathuh, ba kane ka jingjia ka la jia hynne ka step ha ka por 5:40 eiei, ha kaba kawei ka kali Maruti Alto kaba don ia u number ML 05 W 5094 kaba la niah stet da u nongniah hadien ba ym shem la lah ban tehlakam shuh, ka kali ka leit ban tynrah ia u diverder bad hadien ka la leit ban tynrah pat ia kawei ka trok kit mar kaba don ia u number AS 01 DD 9728 kaba dang ieng harud u surok bah NH-06. Ha kane ka jingjia, lai ngut kiba shong ha kane ka kali rit ki la mynsaw jur kiba kynthup ia u nongniah Kynrong Dkhar (23), Rep Dkhar bad u Kharlong Dkhar kiba sah ha ka shnong Wapung, East Jaintia Hills District.
Na ka liang ki pulit ka Nongpoh Traffic Branch, ki la leit mar mar sha katei ka jaka ban pynkit noh ia kiba mynsaw sha Nongpoh Civil Hospital, hynrei namar ka jingmynsaw kaba jur la pynkynriah noh sha Super Care Hospital, Shillong.
