U wei u rangbah briew u la mynsaw jur khamtam ki bynta ka kjat hadien ba u la shah rat ha kawei ka Mahindra Bolero Pickup ha u surok bah National Highway 06 ha ka shnong Mawdiangum, hajan Nongpoh, kane ka jingjia ka la jia ha ki por 8:40 baje eiei mynta ka janmiet.
Katkum ka khubor ba la iohlum, u ne u rangbah ia kaba ka kyrteng ym pat ioh jingtip tikna hynrei la shu khot sin da u Bahrit, katba u dang pyrshang ban jam sha shilliang u surok bah, kawei ka Mahindra pickup kaba thmu ban hiar sha ki bynta jong ka Guwahati ka la rat kynsan ia u bad phet na katei ka jaka, ha kane ka jingjia u tei u rangbah u la mynsaw jur bad shilliang ka kjat ka la pra hi phom.
Mar ia ioh jingtip halor kane ka jingjia, ki bor pulit ka Nongpoh Traffic Branch, ki la poi marmar sha kane ka jaka ban pynkit noh ia u tei u ba la mynsaw jur sha Nongpoh Civil Hospital ban ioh jingsumar. La iathuh ruh, ba ki katto katne ki riew paidbah kiba la sakhi ia katei ka jingjia ki la pyrshang ban kthong ia katei ka kali kaba la rat ia u tei u rangbah, ha kaba tang mar ia poi ha ka lad jong ka Nongpoh Police Station, u nongñiah jong katei ka Mahindra pickup kaba don ia u number ML 13 A 1479 u la pynsangeh ia ka kali bad phet krad ialade na katei ka jaka. Na ka liang ki bor pulit ka Nongpoh Traffic Branch ki dang pynlong ia ka jingtohkit halor kane ka jingjia.
