Ka Ri Bangladesh kan thaw ia ka sorkar ba shipor hapoh ka jingialam u Prof Muhammad Yunus kum u Myntri Rangbahduh hadien ka jingiehnoh kam ka Sheikh Hasina ha ka 5 tarik Naitung na ka jingiakhih ki paidbah, u Prof Yunus un bam smai la shai ka sngi Palei ha ka por 8 baje janmiet, la iathuh u heh shipai u General Waker-Uz-Zaman hynne ka sngi. Ula iathuh ka advisory council ka lah ban don 15 ngut ki dkhot bad na ka liang ki shipai kin ai ka jingkyrshan ia u Professor Muhammad Yunus kum u khlieh ban ialam ia ka sorkar ba shipor. “Ngi dang pynkhreh katba lah ban pynlong ïa ka jingbam smai lashai ka sngi. Kham shwa ka la don ka jingtyrwa ban pynlong ha ka por mynstep. Hynrei kan wanrah ia ka jingeh bad la khmih lynti ba u Dr Yunus un poi ha ka Ri ha ka por 2:10 baje janmiet. Kumta ngi la rai ban pynlong ia ka jingbam smai ha ka por 8 baje mynmiet,” la ong u heh shipai General Waker bad u kyrmen ka shongsuk shongsain kan wan biang hapoh lai-saw sngi namar ba ka jinglong jingman ha kylleng ka ri ka la jai jai mynta.
Ula ong, kito ba donkti ha ki kam runar ba la leh ha kine ki khyndiat sngi kin ym lait bad ka ain kan leh ia kaba donkam. “Ki heh shipai suin bad ki heh shipai duriaw ki don ryngkat ban iatreilang bad ia kane ula iathuh ba ruh ia u Prof Muhammad Yunus” ula bynrap. “Nga sngewkmen shibun ban iakren bad u bad ula pynpaw ba u thrang ban trei na bynta ka jingbha. Nga thikna ba un jop ban ialam ia ngi sha ka rukom synshar paidbah ba ngin ioh jingmyntoi na ka,” la ong u heh shipai. Ka ri Bangladesh ka la mad ki jingiaum snam ha ki khyndiat sngi, na ka jingiakhih paidbah pyrshah ia ka sorkar Awami League haduh ba ka Myntri Rangbahduh ka Sheikh Hasina ka la iehnoh kam bad phet na ka ri ha ka 5 tarik mynta u bnai. Ha kane ka jingiakhih paidbah pyrshah sorkar palat 142 ngut ki briew ki la iap ha kylleng ka ri. Ka jingiehnoh kam ka Hasina ka la jia hadien lai taiew ka jingïakynad kaba la mih na ka jingdawa jong ki samla pule ban pynkylla ïa ka rukom ai bhah ha ki kam ia ki paidbah.
La iathuh palat 400 ngut ki briew ki la iap na ki jingiakhih naduh 16 tarik Naitung haduh mynta ka sngi, Ha ka 23 tarik u Naitung, ka sorkar lyngba ka circular ka la pynkylla ia ka bhah kam katkum ka jingdawa jong ki samla pule bad naduh katei ka por kumba 200 ngut ki briew ki la iap ha ki jingiakynad. Ki nongïakhih ki la dawa ban iehnoh kam ia ka Sheikh Hasina bad ka kynhun myntri ha ka 3 tarik mynta u bnai bad ka sorkar ka shim ka jingkitkhlieh na ka bynta kine ki jingjia ka la iehnoh kam hapoh lai sngi. Ka Hasina ka la bat ia ka shuki Myntri rangbahduh saw sammoi lynter naduh u snem 2009, hynrei ka la hap ban phet krad na la ka ri ha ka 5 tarik mynta u bnai.
