Ka kynhun State Disaster Relief Force (SDRF) hynne ka sngi ka la ioh ban sei noh ia baroh saw tylli ki met jong ki briew ba shah ban na ka jingtwa khyndew ha ka shnong Nongpriang, East Khasi Hills.
Katkum ka jingpyntip ka Tnad Disaster Management, ka kynhun SDRF ka la ioh ban sei shwa ia kawei ka met hynne ka step bad mynta ka janmiet ka la ioh sei sa artylli ki met.
Ha ka 30 tarik, ka kynhun SDRF ka la ioh sei nyngkong ia ka met u Bah Phisar Nongrum (75 snem ka rta) bad hynne ka step, la ioh sei ia ka met u samla Lumlang Riahtam (16 snem ka rta).
La iathuh ba hynne ka janmiet, la ioh ban sei sa ia ka met u Bah Kynmaw Syngai (70 snem ka rta) bad ia ka met jong ka kong Benti Riahtam (60 snem ka rta).
Haba ia dei bad kane, u Deputy Commissioner (DC) ka East Khasi Hills, u SC Sadhu ula pynbna ia ka jingiarap song pisa ba mar T.4 lak sha kiba haiing jong ki 4 ngut ki lanot.
Haba pynthikna ia ka song pisa jingiarap, u Myntri ka tnat Revenue and Disaster Management u Bah Kyrmen Shylla ula pyntip ba un hiar bad leit jngoh ha ka step jong 1 tarik Jylliew sha ka shnong Nongpriang ban peit ia ka jinglong jingman jong kiba haiing bad ha kajuh ka por ban ai mynsiem ia ki.
Haba kren sha ki lad patahi khubor u Bah Kyrmen ula ong, haduh 5 ngut ki briew ki la iap na ki jingjia twa khyndew, kata hapoh shnong Sutnga East Jaintia Hills bad ka Nongpriang East Khasi Hills.
Napdeng kine, lai ngut la pynthikna ba ki la iap bad la dep ithuh ruh ia ki kum u Ohi Nongtdu ba na Pohwailong Stunga, Phisar Nongrum ba 75 snem bad Lumlang Riahtam ba 16 snem na Nongpriang.
“Kumta, ngi don jingmut ban hiar lashai ka sngi sha Nongpriang. Ngin pyrshang ban wad ia ki lad ki lynti ban kyrshan ia ki ba haiing hasem bad ban aiti ruh ia ka cheque ba mar T.4 lak sha kiba ha iing jong kine ki lanot” la ong u Bah Kyrmen.
Haba ai jingkhein ia ki jingpynjulor jong u lapbah kat haduh ka por 1 baje jong ka sngi Thohdieng, u Myntri ula pyntip ba ka jingdon jong ki shnong kiba shah ktah ha East Khasi Hills ka la kot 67 tylli, East Jaintia Hills-45, Ri Bhoi –19, Eastern West Khasi Hills –23, South West Khasi Hills –29, South West Garo Hills –21, West Garo Hills –139, East Garo Hills 92, North Garo Hills –105, West Khasi Hills –11 bad West Jaintia Hills –7 tylli ki shnong.
U iathuh ba ia ka South Garo Hills, ka jinglum jingkhein ka dang iaid shaid shaid. “Ngi la dep bthah ia u Deputy Commissioner ka South Garo Hills ban phah ia ki jingtip sha nga bad kin sa pyrshang ban pynsted ia ka kam”.
Ki iing kiba shah pynjulor ha EKH ki long 54, EJH –46, Ri Bhoi –18, EWKH –25, SWKH-266, SWGH –58, WGH –368, EGH –341, NGH –434, WKH –12, WJH -1 hynrei ha South Garo Hills haduh mynta ka tnat kam pat ioh iaka kaiphod.
Ki jingtei kiba shah pynjulor ha EKH ki long 41 tylli, EJH- 40, Ri Bhoi –2, EWKH –18, SWKH –25, SWGH –2, WGH –34, EGH –16, NGH –9, WKH –1, WJH – 3.
