Ka Jaintia Students Union (JSU) hynne ka sngi kala phah tuklar haka Director General of Police (DGP) ka Idashisha Nongrang halor bun ki mat kynthup ban pynkhlain iaki border police outposts bad ka anti-narcotic.Haka dorkhas ba aiti shaka DGP, ka JSU kala ong ba bun ki border police outposts ha Meghalaya khamtam ha Jaintia Hills kim don bun ki jingduna bad namar kane donkam ban pynkhlain daka ba kynnoh ba ka don ka jingshah pyniap briew bad ka jingshah pynwit ki briew kiba don haki thain khappud haki nong shong shnong ka Assam.Ka seng kala pynkynmaw ba ha u snem 2022, ka Sorkar Jylla kala tyrwa ban thaw Border Police Outposts haki 7 tylli ki jaka ba lah ban don jingiakajia. Kine ki kynthup ha Mukroh bad Tihwieh ha West Jaintia Hills, Mooriap ha East Jaintia Hills, Rani-Jirang ha Ri-Bhoi district bad ha Umwali, Lejadubi bad Langpih ha West Khasi Hills.
Ka seng kala ai jingmut ban pynbha iaki jingtei ha ki outposts khamtam ha Mukroh bad Khanduli namar mynta ka kynti kine 2 tylli ki Outpost ki shu tap daka tin kaba buh jingma iaki Pulit ba pahara wat hadien bala ithuh iaka jaka ba tei thymmai iaka outpost.Halor ka jingdawa ban pynkhlain iaka Anti-Narcotic, ka JSU kala ong “Ngi ai ka jingiaroh iaka tnat Meghalaya Police ka ba la trei shitom ban iakhun pyrshah drok. Hynrei ki don ki jaka ba laitlan. Ngi dawa naka tnat Pulit ban pynkhlain iaka Anti-Narcotic Task Force ha East Jaintia Hills namar kadei ka jaka ba rung bha u drok. Nalor kane ngi dawa ban iatreilang bad ka ki kynhun social workers, ki sengbhalang bad ki village councils ban tehlakam iaka jingrung u drok. Donkam ban pynlong iaka jingialap paidbah ban pynsngewthuh paidbah halor ka jingma u Drok haki jaka iew, ki shnong bad ki jaka pule”.
Ka JSU kala kyntu ban pynlong noh ka jingthepkam ha Jaintia Hills.“Ngi kyntu ban pynlong iaka mareh bad eksamin kam Pulit ha Jaintia Hills namar kane kan iarap iaki samla ka thain kiba shem jingeh ban wan shaduh Shillong. Ki bun ki samla kiba wan naka longing ba duk bad ka long ka ba rem dor ban wan shaduh Shillong. Namar kane ngi kyntu ban pynbiang iaki jingdonkam ha Jaintia Hills naka bynta ka jingmyntoi ki samla nalor baka Shillong kala khapniah lypa”.Haba pynpaw ka jingdonkam ban buh daka helpline number ba treikam 24 kynta, ka JSU pyntip ba kane kan ai jingiarap iaki kynthei bad khynnahkiba ngat haki kam thombor kynthup hala ing. Ka JSU ka kyntu ruh iaka DGP ban khang noh iaki khyrdop bad ki rukom lum pisa beain kiba ktah iaki nongrep bad ki nongkhaii.
“Ki don bun khyrdop beain ha kylleng ki surok kiba la pyniaid daki riew shimet bad ki kynhun kiba lum pisa naki kali kit mar rep bad kiwei ki mar jong ki trai shnong kum ki synsar, maw, kwai, tympew”.Ka JSU ka ong ba kine ki kam beain ki ktah iaka ioh ka kot hapoh ka imlang sahlang namar ka don bynta ruh ba kiew ki dor mata ka ban ktah iaka iew ka hat bad haba kut ka pynduhnong iaki paidbah ka Jylla khamtam ha thain nongkyndong.“Ngi kyntu ban shim ki sienjam ban ithuh iaki khyrdop beain khnang ban pynpra bad ban tohkit khnang ban pynshitom iaki ba donkti. Ban pynthikna ba ki nongkhaii trai Jylla kim dei ban shah pyndik” la ong ka JSU.
