Na ka jingiatreilang bad ka NPP, duh ka Congress 3 ngut ki MDC

Ar ngut ki MDC seng Congress bad uwei u MDC barim na Sohra, ki la pyniasoh bad ka seng National People’s Party (NPP)  ha ophis treikam ka NPP ha nongbah Shillong. Ki ar ngut ki MDC ka Khasi Hills Autonomous District Council (KHADC) na ka seng Congress ba pyniasoh bad ka NPP ki kynthup ia u MDC ka Mairang u Bah Batskhem Ryntathiang, u MDC ka Mawkyrwat u Bah Carness Sohshang bad u MDC barim ka Sohra u Bah Donovan Kharwanlang na ka seng Congress. Ia kine 3 ngut ki MDC kynthup u MDC barim la pdiang sngewbha ryngkat ki nongkyrshan da u National President ka NPP u Conrad K Sangma bad u President ka NPP Meghalaya u Bah Prestone Tynsong ha jingdonlang u Bah Sniawbhlang Dhar, ka Kong Amapareen Lyngdoh bad kiwei.

U Bah Prestone Tynsong ula ong, ba ka NPP ka la pynkhreh bha na ka bynta ka ilekshon ban wan bad ka jingwan pyniasoh ki nongialam sain hima kan iarap ban pynkhlain ia ka seng ban wanrah ia ka jingiadei ba iajan bad ki paidbah ha kylleng ki shnong ka jylla. Katba u Conrad K. Sangma ula ong, ka jingwan pyniasoh ki 3 ngut ki nongialam sha ka seng kan nang pynkhlain ia ka NPP bad kan iarap ruh ban pynurlong ia ki jingthmu jong ka Seng. U la ong, ka NPP ka la ioh jingkyrshan ha kylleng ka jylla bad kane ka la pawshai ka jingwan pyniasoh bun ngut ki nongialam ryngkat ki nongkyrshan ka pynpaw ia ka jingkyrmen ba ka kyrtong ka seng ka Kong Ampareen Lyngdoh kan jop ia ka ilekshon MP Lok Sabha na Shillong Seat.

Ka jingleit pyniasoh ki 2 ngut ki MDC ka Congress kan nang pynkhlain shuh shuh ia ka Executive Committee jong ka KHADC ba la ialam da ka NPP hapoh ka jingialam u Bah Pyniaid Sing Syiem kum u CEM. Kum ban pynpaw, kane ka lah ban long na ka jingiatreilang ka Congress bad ka NPP ha KHADC ka pynlong ba kitei ki MDC kin leit kiew thymmai namar ba sngewieit sngewjan.