Ki MDC ka Congress haduh mynta ki dang bteng ka jingiatreilang bad ka Executive Committee ba ialam da ka NPP ha Khasi Hills Autonomous District Council (KHADC). Lah ban kdew ba dang shen ki nongialam ka seng Congress ki la phah ia ki MDC ban weng noh na ka jingiatreilang bad ka NPP ha KHADC, hadien ba ki 3 ngut ki MLA ha kaba ar ngut ki dei ruh ki MDC ki la mih na ka party da kaba leit ban iasoh bad ka NPP dang shen. Watla ki nongialam ka Congress ki la phah ia ki MDC ba kin weng noh na ka jingiatreilang bad ka NPP, hynrei ki MDC haduh mynta kim pyrwa bad ki dang snoh bad iatreilang ha ka EC ka NPP kaba ialam u bah Pyniaid Sing Syiem ha KHADC. Hadien ka jingmih noh jong ar ngut ki MDC na ka party, ka Congress mynta ka la sah sa tang ar ngut ki MDC kynthup u bah Ronnie V Lyngdoh bad u bah Pynshngain N Syiem ha KHADC.
Kum ban shu kdew ha ka jingialang ka Congress kaba long ha ka 22 tarik u Nailar, ki nongialam ka Congress na ki tnad bapher bapher, ki la ai jingmut ba ki dei ban weng noh ia ka jingiatreilang bad ka NPP ha KHADC hadien ba ki ar ngut ki MDC u bah Charles Marngar bad u bah Gabriel Wahlang ki la phet noh ban leit iasoh sha ka NPP dang shen. U President ka MPCC u bah Vincent H Pala ula ong ba mynshwa ka Congress ka la rai ban iatreilang bad ka NPP ha KHADC da ka jingmut kaba shisur khlem mutdur ba ka NPP kan don ka jingmut sniew ba shapoh ban tan syndon ia ki MLA bad MDC.
U la ong ba ia mynta, wat la ka party ka lah ban ai jingmut ba kin weng noh ia ka jingiatreilang bad ka NPP ha KHADC hynrei ka shong pat ha ka rai ki MDC halor kane. Ula ong ba la aiti ha ki MDC bad u President ka party ban iathir halor kaei kaba bha tam ban shim ia ka rai ha kaba ia dei bad ka jingiatreilang bad ka NPP ha KHADC.
