Ka Kong I. Rympei ka Deputy Director jong ka Meghalaya Board of School Education (MBOSE) kum ka kongsan ka la pynsngew da ka ktien U Blei na ka Testament barim jong ka kitab u Jeremaiah, ka Lynnong 29 bad ka dkhot ba 11 ban ai mynsiem bad pynshlur ia ki khynnah matrik bad samla Class 12 kiba la pass ha ka eksamin jong ki. Ki la don baroh 56 ngut kiba ka Phudmuri Presbyterian Higher Secondary School,Mawlai Phudmuri ka la pynkup burom, 41 ki dei na ka Secondary School Leaving Certificate (SSLC) ne matrik bad 15 ngut na ka Higher Secondary School Leaving Certificate ne Class 12.
Ka Kong Rympei haba ai jingkren ka la ai mynsiem bad pynshlur ia ki samla pule ba ka Lynnong 29, dkhot ba 11, ka ong, “Naba nga tip ia ki jingmut kiba nga pyrkhat shaphang jong phi,” ong U Trai. Ha kajuh ka por ka kongsan ka la pyrto bad ai khublei ia kine ki samla kiba la pass bha bad ka la kyntu ruh ia ki ba kin buh ia U Blei hakhmat duh ha ka jingim jong ki. Ia kane ka jingpynkup burom ka Phudmuri Presbyterian Higher Secondary School, ka la pynlong hynne ka sngi Thohdieng ka 23 tarik mynta u bnai Nailar, 2024 ha Hall jong ka skul jong ka.
Ha kane ka sngi nalor ka Kongsan ka Deputy Director jong ka MBOSE ka kong I. Rympei, la don lang ka Principal jong ka skul ka kong Phila Rynjah, ki nonghikai, ki kmie ki kpa bad kiwei kiwei. Haba kren pdiang sngewbha ka nonghikai kong L. J. Kharbangar ka la pynpaw ia ka jingkmen ba ki khynnah Matrik mynta ka kynti ki la pass baroh, kata da 100 percent. La ioh ia ki kyntien ai khublei na ka nonghikai kong N. Rapsang.
