U Myntri ka tnad jngohkai u Bah Paul Lyngdoh hynne ka sngi ula ong ba u don ia ka thong ban pynlong ia ka jylla kum ka jaka ba kongsan ha ka kam jngohkai pyrthei. Haba jubab ia ka jingiatai ba lyngkot hapoh ka iingdorbar thawain ka jylla, u Bah Paul Lyngdoh ula ong, ka tnad jngohkai ka la buh thong ia ka jylla kum ka jaka ba kongsan ban kyntiew ia ka kam jngohkai kaba don ka jingkitkhlieh ban ai jingmyntoi ia ki nongwan jngohkai bad ia ki shnong ki thaw. Ka sorkar ka la antad ba ki don kumba 50,000 ngut ki briew kiba don bynta ban kamai kajih lyngba ka kam jngohkai pyrthei bad ka sorkar kan kyntiew ia ka roi ka par ka kam jngohkai kum ka lad ban ai kam bad kyntiew ia ka ioh ka kot ki nongshong shnong. U Bah Paul ula ong, ka kam jngohkai ka dei ka lad ban pyniar ia ka jingaikam ai jam kaba don ruh ka kabu ban long kawei na kiba lah noh synniang ia ka ioh ka kot. “Ban pynurlong ia ka thong ka jong ngi, ngi lah dep ban ithuh ia ka jingdonkam ban thaw ia ki jingtei ba kongsan ha ki jaka ba la don lypa bad ba thymmai ban kynthup ia ka jingtei ki jaka sah ba thymmai ban pynbha ia ki jaka ba don ha ki jaka ba itynnad bad ban kyntiew ha baroh ki liang khnang ba ka jingwan ki nongjngohkai kan long kaba kin sah jingkynmaw bad da ka jingthmu ban pynlong ia ka Meghalaya kum ka jaka ba kongsan tam ka ban don ia ki ka Adventure Tourism, Experiential Tourism bad ka Cultural Tourism,” ong u Myntri Sorkar bad ula bynrap ka sorkar ka la ithuh kaba donkam ka long ban ban bhah tyngka shuh shuh na ka bynta ban tei ia ki jingtei. Kumta ngi lah dep ban pynwandur ia ka jingthmu ban pynmih ia ki jingdon jingem ym tang na ka bhah tyngka ka sorkar jylla hynrei wat na ki skhim jong ka sorkar pdeng bad ki Externally Aided Project (EAP)”.
U Bah Paul ula ong, la pyntreikam ia ka Meghalaya Eco Tourism Infrastructure Development Project, kaba dei ka Externally Aided Project hapoh jong ka New Development Bank. “Ha ka jingbhah tyngka ba kot T.730 Klur, katei ka project ka thmu ban tei ia ki jingtei ba donnam ha ki jaka jngohkai ba kongsan kum ha Sohra, Shillong bad Tura. La ioh ruh ia ka bhah tyngka ba T. 60.29 Klur lyngba ka Swadesh Darshan 2.0 na ka bynta ban kyntiew ia ka Meghalayan Age Cave Experience & Water Falls Trails ha Sohra. Ngi la ioh pdiang ia ka bhah tyngka na ka Ministry of Tourism ba T.50 Klur hapoh jong ka Challenge Based Destination Development, kaba dei ka skhim jong ka Swadesh Darshan 2.0” la ong u Bah Paul. Ula ong ba ka sorkar kan bteng ban kyntiew bad pynbha ia ka kam jngohkai bad ka pynleit jingmut ban wanrah ia ki lad kiba thymmai bad kiba kyrpang kaban long na ka bynta ki nongjngohkai na kiwei pat ki ri bad kiba napoh ka ri ruh kumjuh bad ula ai nuksa ba ka Jaintia Hills kala kiew kynsan kum ka jaka jngohkai kaba ki nongjngohkai ki sngewtynnad ban leitkai ha Ialong, Syntu Ksiar, Krang Suri, Shnongpdeng, Darrang bad Iooksi.
U Myntri ula pyntip ruh ba ka sorkar ka la sdang ruh ia ki prokram kiba thymmai ban kyntiew ia ka kam jngohkai ha ka jylla bad ka bynrap ba ka Meghalaya Home Stays Scheme kaba iaid ryngkat bad ka PMEGP ka ai haduh 70% ka Subsidy kaba T.10 lak ban kyntiew ia ka jingtei ia ki Home Stay ha ka jylla ka pynshlur ruh ba kan don ka jingdon bynta lang jong ka shnong ka thaw ha ka kam jngohkai. Baroh ki don 633 tylli ki Home Stay kiba la dep ban bhah tyngka naduh ba la sdang ia katei ka scheme. Ha kawei pat ka liang u Myntri ula pynpaw ruh ia ka jingsngewkhia ia ka jingjia ha ka 30 tarik u Naitung ha Lad Umtyngar bad katei ka la ktah jur ia ka kam jngohkai ha ka jylla.
