U MLA ka BJP u bah AL Hek uba dei ruh u Myntri sorkar jylla, ula ong ba ki paidbah ha jylla Meghalaya lada ki kwah ia ki kam pynroi, ki dei ban jied ia ka BJP kumba long ha Assam. U bah Hek ula kam ruh ba ka ilekshon shiteng samoi ha Gambegre kan kylla bad ki paidbah kin kham noh sha ka BJP namar ba ka la theh bun ki kam pynroi ha katei ka konstiwensi.
“Ki paidbah ka Gambegre kin jied ia ka BJP namar ki kam pynroi kiba la theh ka sorkar BJP na Delhi,” ong u bah Hek haba kren mynta ka sngi sha ki lad pathai khubor. Ka BJP dang shen ka la rai ba ban pyniakhun ia u Bernard R Marak ha kane ka elekshon shiteng samoi na Gambegre ka ban sa long ha ka 13 tarik Naiwieng bad yn niew ha ka 23 tarik.
U bah Hek ula ai nuksa ba ha Assam tang shu khmied ka khlieh sha jrong, yn iohi lut ia ki kam pynroi kiba la leh ka sorkar BJP ha Assam bad kumjuh ki paidbah ha Meghalaya lada ki kwah ia ki kam pynroi, ki dei ban jied ia ka BJP. Ha kajuh ka por, u la ong ba ym don eiei ka jingsngew pher ia ka jingkynthah bad kynnoh ha ka por elekshon namar ba ka dei ka rukom bad kaba kongsan ka long ia ki paidbah ban bishar.
