Na u MR dawa u MLA Umroi ban ai stadium ha madan Kurkalang

Da ka jingsngewkhia halor ka jingbym don kano ka dak ban shimkhia ban pynbit pynbiang ia ka jingdonkam ha ka madan Kurkalang ha ka shnong Lumdaitkhla khamtam ka jingdonkam ia ka Studium kaba paka kaba dei ruh ka mat kaba la sahteng da ki phew snem, halor kane u MLA ka Umroi Konstituensi u Bah Damanbait Lamare u la leit ban aiti da ka dorkhas sha u Myntri Rangbah ka Jylla u Conrad K Sangma ban kyrpad na u ban phaikhmat halor kane ka jingdonkam. Haba kren bad ki Nongthoh Khubor, u Bah Damanbait Lamare, u la pynpaw ba ka long kaba shisha ba kane ka madan jong ka Kurkalang ha Lumdaitkhla ka thain Ri Bhoi Mihngi ka dei ka madan kaba la shu ieh shrah khlem da lah ban pynbha briew ia ka ne ban pynbit pynbiang ia ki jingdonkam la ka dei ia ka madan ialehkai ne wat ia ka stadium kaba paka kaba la shu sahkut tang ha ki jingdawa mynta da ki phew snem.

U la pynpaw ruh, ba kum u nongmihkhmat u ba la iohi ia kane ka jingdonkam kaba hakhmat eh na ka bynta ban pynbit noh ia ki jingdonkam ha kane ka madan Kurkalang nalor ban ioh noh da ka stadium kaba paka, kumta u la shim da ka sienjam ban leit ia kynduh markhmat bad u Myntri Rangbah ka jylla bad ruh ban aiti ia ka dorkhas halor kane ka mat.

La pynpaw ruh, ba ha kane ka jingiakynduh, na ka liang u Conrad K Sangma u la khlei ia ki jingkular ban phaikhmat noh mardor sha kane ka madan ialehkai kaba paka bha ha ka thain Ri Bhoi Mihngi khnang ba ki samla ialehkai kane ka thain kin ioh ia ka jingmyntoi kaba khraw na kane ka madan.