Ka All Meghalaya SSA Non-Teaching Staffs Association (AMSSANTSA) hynne ka sngi ka la pynbna ban pynlong ia ka jingiakhih shong kyllain mungor ba khlem pud naduh ka 29 tarik Naitung. Ia kane ka rai, la shim ha ka jingialang ba la pynlong ha Madan Malki bad kane ka jingiakhih ka dei na ka bynta ban pynpaw ia ka jingpyrshah halor ka jingleh mynthi ka Sorkar Jylla ia ka jingdawa ban kyntiew tulop ki dkhot ka AMSSANTSA.
Ka AMSSANTSA ka pynpaw ba ka jingiakhih yn iai bteng beit tad haduh ba ka Sorkar kan pyndep ia ki jingkular ban kyntiew ia ka tulop. Ha ka kyrwoh ka AMSSANTSA ka la ong, “Ngi la iarai ban pynlong ia ka jingiashong kyllain mungor ba khlem buh por naduh ka 29 tarik Naitung tad haduh ba ka Sorkar kan pynurlong ia ki jingkular ban kyntiew ia ka tulop ba sahteng naduh u snem 2016” ka la ong.
Lah ban kdew ba ki non-teaching staff ki kynthup naduh kito kiba trei ha ki cluster, block, district bad ha Jylla ki ba hap hapoh ka Ophis jong ka Samagra Shiksha Abhiyan, State Education Mission Authority ka Meghalaya.
