Nalor ka phareng, ka hindi ruh ka dei ka ktien Sorkar : Bah Suin

U MLA ka Mawsynram u bah Ollan Sing Suin u la ong ba nalor ka ktien phareng ka ktien Hindi ruh ka dei ka ktien sorkar (Official Language) bad kam iahap ban shu hylla ha Iing Dorbar tang namar u Lat ka jylla u kren da ktien Hindi. U bah Ollan haba kren mynta ka sngi, u la ong ba ma u ruh udei uwei u bym nang bad sngewthuh ia ka ktien Hindi hynrei ban shu hylla pyrshah ia u Lat uba dei dei u khlieh ka Riti Synshar ka long ka bym shongnia bad kam iahap.“Ka ktien Hindi ruh ka dei ka ktien sorkar kum ka ktien phareng ha ka ri India. Bun ki MLA ki bym nang ne sngewthuh Hindi wat ma u ruh bad ki la iakren ruh hapoh ka dorbar ba dei ban wanrah ia u Lat uba nang ban kren phareng hynrei ban shu pyni ia ka jinglong da kaba hylla pyrshah ia u Lat uba dei u khlieh ka riti synshar kam long kaba bha,” ong u bah Ollan.

U la ong ba haba u Lamphang u la buh ia ka jingpynkylla ia ka jingkren sha ka ktien phareng, ka la biang ban sngewthuh ia ki MLA.U MLA ka Mawsynram u la ong ba u Lat u lah ban kren Hindi haba um nang ban kren phareng namar ba ka ktien Hindi ruh ka dei ka ktien sorkar ne official language ha ka ri nalor ka ktien phareng.

“Lada don u nongpynkylla ktien kam lei lei namar ba bun ki MLA ruh ki bym nang Hindi hynrei ngi burom ia u khlieh ka riti synshar, bad ban shu pyni ia kano kano ka jinghylla haba kren da ka official language kam long kaba bha”, la ong u bah Ollan. Lah ban kdew ba ka seng Voice of the People Party (VPP) ka la pyrshah jur ban kren Hindi u Lat ha ka dorbar mang tyngka, hynrei kham hadien ka la sngew hun pat hadien ba u Lamphang ula buh ia ka jingpynkylla ia ka jingkren u Lat sha ka ktien phareng.