Ka jingleit hiar ka Hynniewtrep Youth Council sha ki district ban ialap Pyrshah ia u Drug kala poi sa sha Eastern West Khasi Hills District ha kaba kane ka seng haka 2 tarik u Naiweing 2024 kala ioh ban pynlong iaka jingialang ban pynshai paidbah halor ka jingkynrei jong ki nongdih drug bad ka jingioh rung laitlan jong u drug haka jylla. Shwa ban sdang ia ka jingialang ha Pyndengumiong Mairang ka seng ka la sdang da ka jingraid rally na Madan Mot Tirot Mairang Mission bad la pynkut ha Phyllaw ka Tirot Sing Memorial Hills Pyndengumiong Mairang.
Ha kane ka jingialang pynshai paidbah halor jong u drug, u president ka seng HYC u bah Roykupar Synrem ula khot bad wer ruh iaki paidbah ban wan ia shim bynta haka jingialang paidbah ha Nongbah Shillong haka 7 tarik u Naiwieng 2024 bad ban tur sha Secretariat naka bynta ban dawa naka sorkar ban pyntreikam iaki 7 tylli ki mat jingdawa kiba ka seng kala buh hakhmat jong ka sorkar. U Sordar ka Shnong Pyndengumiong u bah Bornard Syiemiong haba
ai jingkren ha kane ka u la ong ban iakhun ia u drug kam long kaba suk wat ka shnong haba ka iakhun tang bad ki nongdih kiad ruh ka lap ba ka long kaba jwat. U la ong ruh ba tang ka seng HYC marwei kam lah ban iakhun iaka thma pyrshah ia u drug lada ki paidbah, ki shnong bad ka imlang sahlang kim ai iaka jingtreilang. U la khot bad wer iaki paidbah ban ia shnongktilang ha kane ka thma ban ialeh pyrshah ia u Drug khnang ba yn lah ban rat diengkhong ia une u jait jingdih uba la sdang ban suhthied haka jaidbynriew.
