Nangkhlain ka NPP ha Ri Bhoi, pyniasoh ki nongialam UDP bad Congress

Katba nang jan ki sngi ki ia sha ka sngi thep vote na bynta ka ileksion MP jong ka Lok Sabha ka party National People’s Party (NPP) ka la nang pyn khlain shuh shuh ia la ka shlem jong ka khamtam ha Ri Bhoi District, ha kaba mynta ka sngi ka NPP ka la ioh bor shuh shuh hadien ka jingwan pyniasoh da ki nongialam bad nongkitkam ka party Congress bad UDP, ia kine ki nongialam la pdiang burom ia ki ha ka jingialang kaba la long ha Nongpoh, Ri Bhoi District. Ki nongialam ba rangbah bad ba la iaw bha kiba la pyniasoh noh sha ka Shlem jong ka NPP ki kynthup ia u Working President ka UDP state level bad President ka Ri Bhoi District u Bah Donbok Khymdeit u ba dei ruh u MLA barim ka Mawhati Konstituensi, ka MDC barim ka Nongpoh bad ka nongialam ka party Congress ka Kong Rona Khymdeit bad kiwei ki nongialam ka Congress bad UDP kumjuh bad ki nongkitkam.

La pdiang burom ia kine kiba la pyniasoh sha ka party NPP, da u National Vice President bad State President ka NPP u Bah Prestone Tynsong, ha ka jingiadonlang ruh ka kyrtong MP ka Dr. Mazel Ampareen Lyngdoh, u State General Secretary u Ma Sniawbhalang Dhar, ar ngut ki MLA ka NPP ba kynthup ia u Bah Sosthenes Sohtun bad u Bah Damanbait Lamare, kiwei pat ki nongialam ka NPP u Bah Himalaya Shangpliang lem bad kiwei kiwei ki heh ka party NPP. Haba kren ha kane ka sngi, ka Kong Ampareen Lyngdoh ka la pynpaw ia ka jingsngewkmen kaba khraw halor ka jing iohi jngai bad ka mon sngewbha ban pynkhlain ia ka party NPP hapoh ka District bad ka jylla hi baroh kawei da ki nongialam ka party UDP bad Congress ki la wan ban pyniasoh ialade sha kane ka party kaba la nang pyniar ia u jylli ka jingshakri paidbah ha baroh ki liang.

Ka la ong ruh, ba kum ka kyrtong MP na ka NPP ka don shisha ia ka thong ban leit tied ia ka jingkhang bah ha New Delhi na ka bynta ki jingkylla jong ka jylla bad ki nongshong shnong jong ki 60 tylli ki Konstituensi jong ka Shillong Parliamentary Seat, da kaba bynrap ruh, ba ngan long kum kmie bad MLA na bynta baroh kine ki Konstituensi ba kan btin lynti sha ka jingbha bad jing nang kiew ha baroh ki liang. Haba kren ha kane ka jingialang, u Bah Prestone Tynsong hadien ba la pdiang burom ia ki nongialam ka party Congress bad UDP, u la ai jingiaroh ia kine ki nongialam kiba la rai ban kylla noh ki nongialam ba radbah jong ka NPP kaba dei ka party kaba don ha syndah u paidbah ka jylla Meghalaya ym kum kiwei ki party kiba mlien tang ban hylla ha madan madiah bad ban pyrta ieid jaidbynriew tang ha ka tyngam ym ha ka kam.

U la ther ruh da kaba ong, ba kita ki party kiba pyrta ieid jaidbynriew ki dei ban leit buh office ha New Delhi kum ka NPP kaba don ia ka ophis pura, to mih ban iarap ia ki samla ba shah thok ha ki kam ki jam, wat shu kyrkait jaidbynriew shi jaidbynriew haba ki kam pat ym iohi syrngiew haei haei ruh, da kaba khot bad wer ia ki paidbah ba kim dei ban shu pynsep ei ia ka vote jong ki hynrei ban jied ia ka party kaba la pyni shwa ki kam ym ban shu heh nia pathar, da kaba bynrap ruh, ba u khiew u ba khlem dap um shu riew kliang shi kliang, hap satang ki sla dieng ta ruh ba la phuh stem.”Lada ngi jop ha kine ki ar tylli ki MP seat, kine ki MP kin long ki pipe um ba heh ha ryngkat ka tanky kaba heh ban sam umbam umdih bad ban wanrah jingkyrkhu ia ka jylla hi baroh kawei”, pynkut u Bah Prestone Tynsong.