Nangtroin ka Congress, lah ban leit iasoh NPP baroh ki MDC

Shwa ka elekshon MP mynta u snem, ka party Congress ka lah ban duh lut ia ki MDC ki bym long MLA ha KHADC. Katkum ka khubor ba la ioh lum thikna, ki MDC ka Congress lait noh kito kiba long ha kajuh ka por kum ki MLA, kin sa leit rung noh sha ka NPP. Uwei na kine un dei bah Carness Sohshang u MDC ka Congress na Mawkyrwat uban sa rung shen ha kine ki sngi. Uwei pat u MDC ka Congress uba la rung sha ka NPP, u dei u bah Batskhem Ryntathiang na Mairang. Ki MDC ka Congress kiba la rung sha ka NPP kham mynshwa, ki long bah Lamphrang Blah na Mawphlang, Bajop Pyngrope na Rambrai-Jyrngam, bah Fantin Lakadong na Laitumkhrah-Malki.

 Ka Congress ka don lai ngut ki MLA bad long MDC kynthup u bah Ronnie V Lyngdoh na Mylliem, bah Gabriel Wahlang na Nongstoin bad bah Charles Marngar na Mawhati. La ioh jingtip ba ki MLA ka Congress mynta ki don hapdeng ka jingkhuslai namar ba kim i don jingkyrmen ba ka Congress kan wan biang ha ka bor ha ka sorkar pdeng. Dang shen, ki nongkitkam ka Congress na Mawkyrwat konstitwensi ki la risain lut bad katkum ka jingtip, ki la khreh ban leit rung iing thymmai noh sha ka NPP shen.

“U MDC ka Mawkyrwat bah Carness Sohshang ula thikna ban rung iing thymmai noh sha ka NPP, tangba kaba sah mynta ka long sa tang ban pyllait san shyieng shwa bad ka Congress, kaba lah ban jia shen”, la ong ka thymmei khubor.Haba pyrshang ban twad jingtip na u MDC ka Mawkyrwat, ula kyntait ban kren eiei ia mynta halor kane, hynrei u la ong ba un sa kren pat ha kine ki sngi ban wan. Lah ban kdew ba u MDC ka Mawkyrwat u dei u Executive Member ha ka Executive Committee ka NPP kaba ialam u bah Pyniaid Sing Syiem kum u CEM ha KHADC.