U Bah PT Sawkmie u pynpaw ba ha ka por long MLA ma u ki kynthoh ia u ba u ai sa ia ki pliang ki shamoit, hynrei kim sngewthuh pat ba kiwei lei tang mit mit ruh kim ai.
“Ha ka por ba nga long MLA ma nga, ki kynthoh ia nga, ba nga ai sa ia ki pliang ki shamoit, ki dabor ki khiew, hynrei kim sngewthuh pat ba kiwei lei tang mit mit ruh kim ai,” ong u bah Sawkmie haba kren ha ka prokram lyngkot.
U Bah Sawkmie, MLA barim u pynkynmaw ruh ba ha ka por u la long u MLA ma u, tang hapoh ar snem u la lah ban pynioh ia ki bos skul, hynrei mynta hapdeng ka jingbymlong eiei shuh u dang iai bteng ban ai jingiarap da kaba pynioh ia ki Ben na ka bynta kane ka skul, kaba u la pynioh hadien ba ki la ud la nam sha u na ka bynta kine ki jingdonkam kyrkieh jong ka skul.
Ia kine ki Ben u bah Sawkmie u la aiti sha ki nongpyniaid skul ha ka prokram balyngkot ba ki la pynlong ha madan skul, ha ka Lah sngi U Blei ka 22 tarik u Naitung, 2024.
U la pynpaw ba ha ka por ba u la long u MLA, da ka jingisynei U Blei u la lah ban pynioh ia ki skul bos, kawei na ka bynta ka Sacred Heart Boys Higher Secondary School bad kawei na ka bynta ka Sacred Heart Girls Higher Secondary School, Mawlai. Ym tang katta hynrei u la lah ruh ban pynioh sa kawei ka bos na ka bynta ka Shelter Home kaba kit ia ki khunswet.
Katba na ka liang i Sister Bakhmihlang Rangtong, iba khmih ia ka skul Rosario i la ai khublei bad pynpaw ka jingsngewnguh ia u bah Sawkmie, ba wat haduh mynta ba im longeiei shuh ruh, hynrei ki dangiai bteng ban ñiew ia u kum uwei u nongiarap ba hakhmat eh jong ka skul jong ki.
I ong ruh, haba ki phaikhmat sha i im ju pynduh jingkyrmen bad i ju ai mynsiem beit ia ki barabor.
Ha kane ka sngi ki khynnah skul ki la pdiang burom ia bah PT Sawkmie, da ka jingrwai bad jingshad.
