Nga kwah ban iohi ba ka NPP kan mih pli kum ha ka por ka APHLC: Ampareen

Ka Kyrtong MP na Shillong Parliamentary ka kong Ampareen ka la ong ba ka National Peoples Party  (NPP) kam dei ka party nongwei hynrei kadei ka party ba la ithuh da ka sorkar kmie na Delhi. Ka kong Ampareen haba kren ha ka jingialang jong ka iakynduh ia ki nongialam ba hakhmat eh ka NPP ka Sohiong Block, ka la ong ba ka jingkynnoh ia ka party NPP ba kadei ka party nongwei ka long kaba bakla.

“Ka jingkynnoh ia ka NPP ba kadei ka party nongwei ka long kaba bakla. Ngim dei ki nongwei hynrei ngi don bynta lang ha kane ka party kaba la sdang ban khie ban wan shakhmat na bynta u paidbah jong ki lai tylli ki jaidbynriew. Nga don ha kane ka party kaba la ithuh da ka sorkar kmie, nga tip bun kiwei ki ap tmang ban woh dong ia ka party NPP.” “Nga kwah ban iohi ba ka NPP kan mih pli kum ha ka por ka APHLC ha u snem 1972”, ka la ong.

Ha kajuh ka por ka la pynshai ruh ba ka party NPP kam dei ka BJP. “ Ka jingkynnoh ba ka party NPP kadei ka BJP ka long ka bym lah long. Lada dei kumta, ka UDP ka HSPDP kaba iatreilang bad ka NPP ha kane ka sorkar, ka la kylla long noh ka NPP namar ba ka ia synrop lang bad ngi,” ka la ong.